Герман, Бельгийн үерийн гамшигт нэрвэгдсэн бүсийн оршин суугчид үерийн ус багасаж, орчин тойрноо цэвэрлэх ажлыг эхлүүлжээ.
Аврах багийнхан сураггүй болсон хүмүүсийг эрэн хайх ажиллагааг үргэлжлүүлсээр байна. Байгалийн гамшигт үзэгдлийн улмаас амиа алдсан хүний тоо 170-д хүрээд байгаа бөгөөд цаашид нэмэгдэж болзошгүй байна.
Мөн үерийн улмаас далангууд элэгдсэн байж болзошгүйд олон нийт ихээхэн санаа зовниж байна. Германы баруун өмнөд нутгийн Бонн хот дахь “Steinbachtal” далангийн томоохон хэсгүүд эвдэрсэн тул бат бөх байдал нь алдагджээ. Иймээс урсгал дагуу хэсэгт амьдардаг оршин суугчдыг нүүлгэн шилжүүлж байгаа. Цаашид илүү олон хүнд нүүх зөвлөмж хүргүүлж магадгүй нь. Түүнчлэн Хойд Рейн-Вестфалиа мужийн Хейнсберг дүүрэг дэх өөр нэгэн далангийн ойр орчимд амьдардаг олон зуун хүнийг нүүлгэн шилжүүлжээ. Үерийн гамшгаас гадна нэгэн улстөрчдийн үйлдэл олон нийтийн шүүмжлэлийг дагууллаа. Германы нэртэй улстөрч үерт нэрвэгдсэн бүсэд очих үеэрээ инээсэн нь камерт өртжээ. Канцлер Ангела Меркелийн халааг авахаар өрсөлдөж буй нэр дэвшигчдийн нэг болох Армин Лашет Ерөнхийлөгч Франк-Уолтер Штайнмайерыг амиа алдагсдын ар гэрийнхэнд эмгэнэл илэрхийлж байх үеэр хамтран зүтгэгсэдтэйгээ хошигнож буй нь камерын дуранд өртсөн нь олны бухимдлыг төрүүллээ.
Германд үерийн улмаас 143 хүн амиа алдсаны дотор дөрвөн аврагч, гал сөнөөгч байжээ. Бельгид сүүлийн мэдээллээр 27 хүн амиа алдсан байна. Бельгийн Ерөнхий сайд Александр Де Кроо долоодугаар сарын 20-ныг үндэсний гашуудлын өдөр болгохоо зарлажээ.
Discussion about this post