74 тэрбум төгрөгийн өртэй атлаа “Монголросцветмет”-ийн захирлууд “Таван Богд”-оос 200 саяар машин авчээ

74 тэрбум бол маш их хэмжээний өр.  Жилийн цэвэр ашиг нь 22 гаруй тэрбум төгрөгөөс 10 орчим тэрбум болтлоо буурчихаад байгаа “Монголросцветмет” ТӨҮГ-ын газрын тухайд  бүр ч их өр юм. Гэвч компанийн удирдлагууд үүнд санаа зовсон шинжгүй уран сайхны кино ивээн тэтгэж, өндөр үнэтэй машин 2-3-аар нь худалдан авч сууна. Өнгөрсөн оны 2-р сард “Монголросцветмет” ТӨҮГ суудлын машин худалдан авах гурван багцтай 406 сая төгрөгийн тендер зарлажээ.   Мөнгийг өөрийн хөрөнгөнөөс гаргажээ. Үнийн дүнгээс харахад дарга нарын тендерийн хэллэгээр “Лексус 570-тай дүйцэхүйц” унаа авах гэсэн бололтой.  Энэ тендерт “Таван Богд ” компани 200 сая төгрөгийн үнэ санал болгон ялжээ. Тендерийн явцад төсөвт өртөг тал үнээр буусан ч 200 сая төгрөг бас л их хөрөнгө.  Энэ мөнгийг нийгмийн даатгалаас эхлээд өрөндөө өгсөн бол бага гэлтгүй хасагдах л байжээ.