Сайн ноён хан аймгийн Далай Чойнхор вангийн хошуу Хөвсгөл аймгийн Жаргалант сумын нутагт 1880-аад оны эхээр төржээ. Эцэг Пүрэв нь дархан хүн байсан бөгөөд Пүрэв дархны бүтээсэн бурхан одоо ч элбэг байдаг аж. Богд эзэн Өндөр Гонгорыг сонирхож зарлиг дуудлага буулгаж, улсын Сангийн даамлаар /даргаар / тохоон ажиллуулсан ажээ.
П. Гонгор нь төрөлхийн өндөр том биетэй хүн байсан түүний өндөр нь 2.36 см юм. Даншиг наадмын начин цолтой бөх байжээ.
ИЙМ НЭГ ДОМОГ БИЙ
Монгол Даяар алдаршсан, өдгөө ч нэр нь цуурайтсаар байгаа өндөр Гонгорыг нэг удаа Америкийн худалдааны төлөөлөгч гэртээ урьж дайлж цайлжээ. Америк хүн өндөр Гонгорыг элдвээр зусардаж, манай пүүсээс дуртай цагтаа ирж хүссэн хэмжээгээрээ мөнгө авч хэрэглэж болно. Бид танаас энэ насанд тань эргүүлж нэхэхгүй гэж. Өндөр Гонгор учрыг магадалж, тэгвэл хойд насандаа яах гэж асуутал, та их ухаантай хүн юм. Та хэзээ нэгэн цагт үхэх нь дамжиггүй, тэр цагт эрдэнэт ясаа Америк улсад тушаавал бид бурхан адил тахиж, таны нэр алдрыг дэлхий даяар цуурайтуулна гэсэн байна. Энэ үгийг дутуу хагас сонсмогцоо Гонгорын уур хилэн бадарч, ар халхын буян байхад хувхай ясаа худалдан идэх болоогүй, муусайн луйварчингууд манай нутгаас шалавхан зайлцгаа гээд ухасхийн босож Америк төлөөлөгчийг унатал цохиод гарч явжээ. Хувхай ясыг минь алтанд барьцаалж авах гэлээ гэж их л сэжиглэн, уурлаж байсан гэдэг.
Өндөр Гонгор хожим нь өөрийн төрсөн нутаг Бага булагтаа очсон бөгөөд үймээний өмнөхөн 1931-1932 оны үед 49-дээ таалал болжээ.
Discussion about this post