“Forbes” сэтгүүл дэлхийн баячуудын жагсаалтаа шинэчлэв. 200 тэрбум долларын хөрөнгөтэй, Францын “Vuitton Moët Hennessy” (LVMH) группийн ерөнхийлөгч Бернар Арно манай гарагийн хамгийн баян эр болжээ. 72 настай Арногийн хөрөнгө зөвхөн сүүлийн 1 хоногт л гэхэд 1,4 тэрбум доллараар нэмэгджээ. 2021 он гарснаас хойш түүний мөнгө 50 тэрбум доллараар арвижсан байна. Арно бол хөрөнгө нь 200 тэрбум доллар давсан дэлхийн 2 дахь хүн, түүнээс өмнө зөвхөн Безос ийм хэмжээний хөрөнгөтэй баян байлаа. Хоёрт орсон “Amazon”-ы тэргүүн Жефф Безос 199,6 тэрбум доллартай. Америкийн иргэн, 57 настай Жефф Безос бас “The Washington Post” сонинтой, “Blue Origin” хэмээх хувийн, сансрын компанитай. Удахгүй буюу 7 сарын 20-нд өөрийн компаний сансрын хөлгөөр сансарт нисэхээр бэлдэж байгаа билээ. Америкийн “Tesla”, “SpaceX” компаниудын ерөнхий захирал, 49 настай Илон Маск гуравт жагсав, түүний хөрөнгө 154,2 тэрбум доллар. Дөрөвт бичигдсэн “Microsoft” корпорацийг үндэслэгч, 65 настай Билл Гейтсийн хөрөнгө 125,6 тэрбум доллар болжээ. “Facebook” компаний тэргүүн, 36 настай Марк Цукерберг 121,3 тэрбум доллараар айргийн тавд багтлаа.
Discussion about this post