Америкийн тэрбумтан, “Tesla” компаний ерөнхий захирал Илон Маск өнгөрсөн 7 хоногт “NBC” телевизийн “Saturday Night Live” шоуны шууд эфирт оролцжээ. Шоуны үеэр тэрбумтан эр хамаг сэтгэл санаагаа уудалж Аспергерийн синдромтой гэдгээ ч нуусангүй. (Энэ бол нэг ёсны сэтгэцийн хөгжлийн согог, нийгмийн харилцаанд орох болон хүрээлэн буй орчныг хүлээн авахад хүндрэлтэй, хязгаарлагдмал хэвшсэн алхам үйлдэлтэй…). Түүнчлэн Илон Маск өөрийн бизнес төлөвлөгөөний тухай ярихдаа өөрийгөө шоолон инээж хүмүүсийг баясгав.
Хамгийн хачирхалтай нь, тэрбумтан ярианы үеэр “Dogecoin” крипто валютыг луйвар гэж нэрлэжээ. Үүнээс болоод тус валютын үнэ ганцхан хоногт 30 хувиар навс уналаа. Түүнчлэн Илон Маск өчигдөр буюу 5 сарын 13-нд “Tesla” компаний цахилгаан машиныг биткоиноор зарахаа зогсоож байгаа талаар мэдэгдсэн юм. Энэ бүхнээс болж дэлхийн хамгийн өндөр үнэтэй криптовалютын үнэ 17 хувиар унав, дараа нь бүр 47 мянган доллар болжээ. Тэр бүү хэл энэ долоо хоногт “Tesla” компаний хувьцаа 15 хувь унаж, улмаар Илон Маскийн хөрөнгө 20,5 тэрбум доллараар багасав. Гэсэн ч тэр манай гарагийн хамгийн баян хүмүүсийн жагсаалтын 3-т жагссан хэвээр байгаа. Уг нь шоунд оролцохын өмнө түүний хөрөнгө 166 тэрбум доллар байсан, харин одоо 145,5 тэрбум доллар үлджээ. Дашрамд дурдахад, Илон Маскийн хөрөнгийн нилээд буюу 21% нь “Tesla” компани хувьцаа ба “SpaceX” сансрын компаний хувиас бүрддэг билээ. Маск хэдийгээр 20,5 тэрбум доллараа алдсан ч түүний хөрөнгө өнгөрсөн жилийнхээсээ 110 тэрбум доллараар их байна.
Discussion about this post