Америкийн ахмад дайчдын амь насыг санаатай хөнөөсөн сувилагч бүсгүйд Шүүх хурлаас 7 удаа бүх насаар нь хорих ял ногдуулсан тухай “USA Today” сонин мэдээлэв. Баруун Виржини нутгийн Кларксбург хотын эмнэлэгт сувилагчаар ажиллаж байсан Рета Мэйс гэгч бүсгүй 2017 оны 7-р сараас 2018 оны 6-р сар хүртэл хугацаанд 7 ахмад дайчинд инсулины үхлийн тун тарьж хөнөөсөн нь тогтоогджээ. Мөн түүнийг өөр нэг хүнийг алахыг завдсан гэж буруутгасан. Сувилагчийн гар амиа алдсан ахмад дайчид 81-96 настай, тэд 1939-1945 оны Дэлхийн II дайн, 1950-1953 оны Солонгосын хойгийн дайнд оролцож явжээ.
Мужийн Хойд тойргийн Шүүх хурлын шийдвэрээр сувилагч Рета Мэйсийг насан туршид нь 7 удаа хорих ял ногдуулж шийтгэжээ. Тус эмнэлэгт ойр ойрхон гарах болсон сэжигтэй, гэнэтийн үхлийг мөрдөн шалгах ажиллагаа 2018 оноос эхэлжээ. Мэйс 2017 оны 7-р сараас эмнэлгийн шөнийн жижүүр хийж эхэлсэн ба яг энэ үеэс ахмад настнууд нууцлаг байдлаар нас барах нь олширсон аж. Дээд шатны байгууллагуудаас хийсэн шалгалтын явцад инсулин хэмээх цусан дахь сахарын түвшнийг зохицуулдаг эм тариаг хяналтгүй шахам хадгалж байсан нь илэрчээ.
Discussion about this post