Юу ч гэсэн нүдний шил зүүчихье

АН-ынхан яаж ч ажиллаад гарч ирж чаддаггүй ув улаан тойрог бол Увсынх. Энэ тойрогт Батлан хамгаалахын сайд асан, “Эрдэнэт” үйлдвэрийн захирал асан, АН-ын дарга асан гэсэн олон цол чимэгтэй, одоогийн Монгол улсын ерөнхий прокурор Д.Дорлигжав мөн ч их нэр дэвшсэн дээ. Харамсалтай нь УИХ-д сонгоогүй.  Тэр байтугай Дархан аварга Хорлоогийн Баянмөнх Увсад нэр дэвшиж уначихаад “Би ч дуулаад, Дэжимбээ ч дуулаад явлаа, барсангүй ээ” гэсээр хотод ирж байсан удаатай. Энэ шороотой тойрогт АН-аас нэр дэвшсэн хүн мөнгөний гарз болоод л өнгөрдөг. АН-ын тэрбумтан Д.Нямхүү, хуульч Мэндсайхан хоёр 2012 онд хөтлөлцөж очоод, Ч.Хүрэлбаатар, Б.Чойжилсүрэн хоёрт ялагдчихсан, хэл ам, хэрүүл маргаан нь одоо хүртэл дуусаагүй байгаа. Харин 2016 онд Увсаас алдарт Х.Баянмөнх аваргын хүү Б.Гантогтох гарьд нэр дэвшихээр шулуудаж, АН-ын ҮЗХ-нд орчихсон, эрдэмтэн шиг нүдний шил зүүчихээд ҮЗХ-ны хурлыг таслалгүй идэвхтэй ирэх болсон. Ойр дотных нь хүмүүс “Та улс төр сайн мэдэх юм уу. Яаж ажиллая гэж бодож байна. PR-аа яаж хийх юм, имижээ яаж бүрдүүлэх юм бэ? Нэртэй улстөрч Д.Дорлигжав удаа дараа унаж байсан, таны аав Дархан аварга хүн хүртэл унаж явсан шороотой тойрог ш дээ” гэхэд манай гарьд “Мэдэхгүй ээ, юу ч гэсэн нүдний шил зүүчихье дээ” гэж хариулсан гэнэ. Б.Гантогтох гарьд бол хүний хайлан гэж мэдэх хүмүүс нь ярьдаг. Улсын их баяр наадамд гурвантаа шөвгөрсөн ч Улсын арслан цол авч чадаагүй аз муутай бөх. Зүлэг ногоон дэвжээ нь хатуурхаж авах ёстой цолоо авч чадаагүй юм чинь улс төрийн дэвжээ зөөлөн байж УИХ-ын гишүүн болоосой гэж Б.Гантогтох гарьдад фенүүдийнх нь өмнөөс ерөөе. WWW.TAIZ.MN 2013. 06.06