Нялх биетэй, нярай хүүхэдтэй ээжийг ХӨСҮТ рүү өвөл нимгэн зөөхөд иргэд “Ялтан биш дээ, ямар гэж…” дургүйцсэн хандлага олон харагдсан. Тэгэхээр ял сонссон, ер нь хоригдон саатуулагдаж байгаа хүнийг яасан ч яах вэ гэсэн байдал түгээмэл байдаг нь илт. Уг нь шүүхээс ял сонсож эрхээ хасуулсан бай яг л ялгаагүй хандвал нөгөө хүнлэг, энэрэнгүй ардчилсан нийгэм нь цогцолно. Одоо цар тахал нэрийн дор иргэдээ эмнэлгийн үйлчилгээ хэвийн авах аргагүй хааж боож, Хорооны дарга нар Хойд Солонгос шиг цэрэг хувцас өмсдөг боллоо. Энэ нөхцөлд шорон гянданд юу болж байгааг бурхан л мэднэ биз ээ.
Анхан шатны шүүхийн шийдвэрийг хүлээн зөвшөөрөөгүй, Давж заалдах шатны шүүхэд өргөдөл өгсөн буюу хоригдол болоогүй хоригдогч нарын байрлаж буй 409-р хорих ангид өнөөдрийн байдлаар 100 гаруй иргэн халдвартай болжээ.
Шүүхийн шийдвэрээр түр саатуулагдахаар ирсэн хоригдогчоос анхлан халдвар илэрснээр олон тооны хоригдол болон Шүүхийн шийдвэрийн алба хаагчид халдвар аваад байгаа аж.
Хоригдогч, хоригдол нар агааргүй, чийгтэй орчинд байдаг. Мөн тэдэнд шим тэжээл бага хоол өгдгөөс биеийн дархлаа ихэнх хоригдлууд муу байдаг аж. Мөн ял эдэлж буй хоригдлууд хавсарсан өвчтэй, хавдартай, хүнд гэмтэлтэй зэрэг эрүүл мэндийн хүндхэн байдалтай ирдэг байна.
Энэ талаар ШШГЕГ-аас “Манайхаас эм хангамж, эмчилгээ сайн үзүүлж байгаа. Сүүлийн мэдээллээр 50 гаруй хүнээс халдвар илэрч Урьдчилан сэргийлэх 461-р ангид болон Түр саатуулах байранд тусгаарлаад байгаа” гэж тайлбарласан.
ШШГЕГ-ын дарга, хурандаа Д.Загджавыг салбарынхан нь мэргэжлийн бус Уул уурхайн дэд сайдаас энэ хүртэл “өнхөрч” ирсэн МАН-ын кадр гэж шүүмжилдэг. Өдгөө олон хорих ангиудад халдвар гарсан нь асуудал болоод байна. Урьдчилан саатуулагдсан Олимпийн аварга Н.Түвшинбаяр хүртэл ШШГЕГ-ын харъяа газар хоригдох үедээ коронавирусаар халдварласан нь ил боллоо.
Хорих ангиудад коронавирусын халдварын тархалт нэмэгдэж, хоригдол, ажилтнууд өвчилсөөр байгаа. Хамгийн түрүүнд вакцинжуулалтад хамрагдсан 409-р нээлттэй хорих ангийн дарга, ажилтнууд халдвар авч халдвар авч, 22 хоригдол коронавирусаар өвчилсөн. Хорих 461-р анги буюу Урдьчилсан хорих төвд өчигдрийн байдлаар 96 хүн коронавирусаар өвчилсөн. Хорих ангийн дарга нь өмгөөлөгчид рүү нь утасдаад “Хүнээ авахгүй бол манайх дийлэхээ болилоо” гэсэн байна. Харин энэ үед “хамгийн том дарга” УИХ-ын гишүүн асан Д.Загджав дарга ямар нэгэн шийдвэртэй алхам хийхгүй байсаар л байна.
Discussion about this post