БСШУС-ын байнгын хорооны дарга Г.Дамдинням Н.Түвшинбаярын “цалинг хасна”

УИХ-ын чуулганаар хэлэлцэгдсэн Боловсрол, соёл, шинжлэх ухаан, спортын байнгын хорооны даргаар Г.Дамдинням 85,3 хувийн саналаар сонгогдсон. БСШУС-ын байнгын хорооны удирдлагаар сонгогдоод удаагүй байгаа Г.Дамдинням “спортын алдартай тамирчид холбогдсон харамсалтай асуудал үүссэнтэй холбогдуулан тамирчдын урамшуулал, санхүүжилт, ёс зүй, сахилга хариуцлагатай холбоотой бичиг баримт, хууль дүрмийг” судалж байгаа аж.

Одоо хүчин төгөлдөр үйлчилж байгаа хууль, дүрмээс харахад цаашид биеийн тамир, спортын өндөр амжилт гаргасан тамирчдад төрөөс олгодог санхүүжилтийг тухайн салбар, холбоодын ёс зүй, сахилга хариуцлагын чиглэлээр хийж хэрэгжүүлсэн ажил, тамирчдад хариуцлага тооцсон байдал зэрэгтэй уялдуулж олгох эрхзүйн зохицуулалтыг бий болгох хэрэгцээ шаардлага үүсжээ гэж Г.Дамдинням гишүүн үзжээ.  Ялангуяа олимп, тив дэлхийн тэмцээнд өндөр амжилт үзүүлсэн тамирчид, дасгалжуулагчдад мөнгөн урамшуулал, шагнал олгох Засгийн газрын одоогийн журамд зөвхөн допингийн асуудал тусгагдсаныг шинэчилж, ёс зүйн зөрчлүүдийг нэмж тусгах шаардлагатай гэжээ.

Эцэст нь Г.Дамдинням “Ямартай ч олонд ил болоод байгаа тамирчдын ёсзүйтэй холбоотой асуудал хуулийн дагуу үнэн зөвөөр шийдэгдэнэ гэдэгт найдаж байна” гэсэн байна.