Саяхан цахимаар Баян-Өлгий аймгийн Улаанхус сумын Хөххөтөл багийн сургуулийн захирлын суудлын төлөөх орилоон хашгираан, сандал ширээ нураасан ширүүхэн тэмцэлтэй бичлэг тарсан. Тэгвэл үүнээс өмнөхөн сумын захиргааны байранд бүр хамраас нь цус гаргасан хатуу мөргөлт болжээ. Сумын МАН-ын дарга Б.А нь халамцуудаа багийн Засаг даргын сонгуульд нэр дэвшихээр ирсэн Х.Б-г барьж аваад мөргөж хүний биед хөнгөн гэмтэл учруулсан гэмт хэрэг үйлджээ. Ер нь тухайн өдөр ЗДТГ-д архидалт болсон байна.
“ …МАН-ын дарга ажилтай Б.А орж ирээд Х.Б-г заамдаж аван хананд тулгаж байгаад толгойгоороо хамар тус газарт нэг удаа мөргөсөн. Тэгэхэд Х.Б-гийн хамраас нь цус гарсан ба тухайн үед өрөөнд Бердимурат, Ерлан, Ермурат нар архи уугаад сууж байсан…”
Өрөөнд ийм явдал болсон бол коридорт ч ширүүн юм болжээ.
“… Өдрийн 17 цагийн үед Засаг даргын тамгын газрын байрны 1-р давхарт сууж байхад гэнэт орилж хашхирсан дуу чимээ сонсогдсон. Тэгээд хоёр давхарт гарахад шатан дээр ИТХ-ын дарга Т.Нурбол хурлын нарийн бичгийн дарга Ж.Сламбол хоёр хоорондоо заамдалцсан байдалтай, Ж.Сламболын хүрмийн товчнууд нь унасан зогсож байхаар нь би тэр хоёрыг салгасан. Ж.Сламбол цагдаагийн байгууллагад гомдол гаргана гэж хэлж байсан. Тэгээд би дээшээ гарахад Х.Б-гийн хамар тус газар нь шалбарчихсан, нүүр нь цус болсон, хажууд нь МАН-ын дарга ажилтай Б.А зогсож байсан …”
Мөргөлдөөний үеэр “Чи манай намаас урваад явсан урвагч, танай бэрийг би албан тушаалд дэвшүүлж байсан” гэх зэргээр орилолджээ. Хохирогчид хамрын хянга ясны хугарал, таславчийн муруйлт, зүүн доод зовхинд цус хуралт, хамрын нуруунд зулгаралт гэмтлүүд учирчээ. Намын дарга хохиролд 2,1 сая төгрөг төлөөд 650 мянган төгрөгөөр торгуулжээ. Баян-Өлгийн аймгийн МАН-ын даргаар УИХ-ын гишүүн, Гэр бүл, хөдөлмөр, нийгмийн хамгааллын сайд Т.Аубакир ажилладаг. ИЗНН-аас жагсаалтаар орж ирсэн С.Замира нь Улаанхус суманд төржээ.
Discussion about this post