Австралийн Сидней хотоос гаралтай залуу бүсгүй Жейн Гиллеспи 1977 онд Индонезийн Бали арал руу аялжээ. Энэ богинохон аялал түүний амьдралыг орвонгоор нь өөрчилнө гэж огт төсөөлсөнгүй.
Аялагч бүсгүй Ободе хотод Бали язгууртны гэр бүлийн гишүүн ханхүү Тжокорда Рака Сокаватитай уулзсан бөгөөд тэр хоёр бие биедээ татагдсан байна. Соёл, шашин шүтлэг, амьдралын хэв маяг асар их ялгаатай ч тэдний хайр сэтгэл хүрээлсэн олон саад бэрхшээлээс илүү хүчтэй гэдгийг баталсан юм.
Хааны гэр бүл анх энэхүү харилцаагаа эсэргүүцэж, гадаадын “Барууны” охиныг хүлээн зөвшөөрөхөөс татгалзсан ч ханхүү шийдвэртээ бат зогсож, Жейн ч зоригтойгоор түүний талд зогсохыг сонгосон байна. Хуримынхаа өмнө тэр нутгийн заншлаар толгойн үс, хөмсгөө хусах, дахин төрөхийг бэлгэдэх зан үйл хийж, хааны өгсөн Жиро Асри Киртиаса гүнж нэртэй болжээ. Австрали бүсгүй Бали язгууртны ёс заншил, уламжлалыг бүрэн дагажээ.
Гэхдээ Хааны ордон доторх амьдрал, Жейнийн төсөөлж байсан гүнжийн үлгэрээс хол байсан. Тог цахилгаан, утас ашиглах боломжгүй байсан бөгөөд тэр зөвхөн зөвшөөрөлтэйгөөр ордноос гарч, гадаад ертөнцөөс тусгаарлагдан амьдарчээ. Нэг үгээр хоригдсон гэж болно. Зан заншил, уламжлал түүнд их хүнд туссан. Тухайлбал ханхүү нэгээс олон эхнэртэй гэрлэж болно, Жейн үүнийг чимээгүй хүлээж авах хэрэгтэй болсон. Эх орноосоо алслагдмал газар, гэр бүлийнхнээсээ холбоо тасарч, танихгүй хатуу ертөнцийг туулж яваа залуу гүнж тэсвэр тэвчээр, хатуужлыг шалгасан өдөр тутмын сорилтуудтай байнга нүүр тулж байлаа.
Санхүүгийн хүндрэл гарснаар хос Балиг орхиж, Сидней рүү нүүх шаардлагатай болжээ. Балийн хунтайж Австралид ирээд гэр бүлээ тэжээж тэтгэхийн тулд цэцэрлэгч, зөөгчийн даруухан ажилд оржээ. Гэсэн ч тэдний хайр илүү хүчтэй байж, олон жилийн турш бүхнийг тэвчиж, тэд хамтдаа амьдралаа босгож, хүүхдүүдээ өсгөж, нөхцөл байдал сайжирсан үед Бали руу буцаж ирсэн байна.
Жейн одоо Жиро Асри Киртиаса хэмээх жинхэнэ гүнж болж, шашин шүтлэг, уламжлал, нийгмийн давхаргыг шалгуурыг давж, жинхэнэ хайрын бэлгэ тэмдэг болжээ. Гэрлээд 45 жил болсон тэдний түүх нь хамгийн хатуу хил хязгаарыг ч даван туулах, үнэнч байдал, хайрын хүч чадлын гайхалтай гэрч болж байдаг.
Discussion about this post