О.АЛТАНГЭРЭЛ: Ард түмэн, сонгогчдын өмнө амласан Хууль бус хөрөнгийг хураах тухай хуулиа батлуулмаар байна

Хууль зүй, дотоод хэргийн сайд О.Алтангэрэлээс цаг үийн асуудлууд дээр байр суурийг нь тодрууллаа.

  -Ардчилсан нам Засгийн газарт хамтарсан хэвээр үлдэх үү, эсвэл гарах уу?

Манай нам асуудлаа нээлттэй ярьдаг. Засгаас гарах ёстой гэсэн үзэл бодолтой гишүүд байна. Хамтрах ёстой гэсэн байр суурьтай гишүүд ч бий. Нам бол асуудлаа дүрмээрээ шийдвэрлээд явна. Шийдвэр гаргадаг байгууллагууд бий. Үндэсний бодлогын хороо гэдэг байгууллага байна. Намын Их хурал ч гэж бий. Шаардлагатай гэвэл асуудлыг нийт гишүүдээрээ хэлэлцсэн ч болно. Одоогоор аль ч шатны хурлаар энэ асуудлыг хэлэлцээгүй байгаа. Намын шийдвэр нам дээрээ, төрийн шийдвэр төр дээрээ гарах ёстой.

Ерөнхий сайдад эрүүгийн хариуцлага тооцох боломжтой юу?

Ерөнхий сайдыг гэр бүлтэй нь холбоотой асуудлаар шалгах, хэрэв үнэхээр буруутай бол хариуцлага хүлээлгэх эрхзүйн орчин нь бий, гэхдээ процесс байхгүй. Нийтийн албан тушаалтны хууль бус хөрөнгийг хураахтай холбоотой хуулийн төсөл бол 2002 оноос хойш хөөн хэлэлцэх хугацаагаар ял завшсан хүмүүсийн тухай яриад байгаа юм.

Ерөнхий сайдын мэдээллийг үзсэн байх, ямар байр суурь илэрхийлэх вэ?

Үзсэн. Ямар ч байсан асуудлаа шалгуулахад бэлэн байгаа юм байна, ард түмнээсээ уулчлалт хүссэн байна билээ.

Ард түмнийг “ялаа” гэж хэлж болдог юм уу?

Тэр бол өрнөж байгаа үйл явдлын цаана байгаа хэсэг бүлэг этгээдийг хэлж байна гэж ойлгосон.

Та улс төрийн манлайлал үзүүлээд ЗГ-аас түрүүлээд гарчихаж болохгүй юм уу?

Засагт хамтрах талаар АН-ын ҮБХ болон бүлгийн шийдвэр гарсан. Энэ шийдвэр дээр үндэслэж асуудалд хандаж байгаа. Мөн өнөөдрийн байдлаар хүний эрхтэй холбоотой 10 гаруй хуулийн төсөл өргөн барьчихсан байгаа. Нэмж өргөн барихад бэлэн болсон арваад хуулийн төсөл бий. Ард түмэн, сонгогчдын өмнө амласан Хууль бус хөрөнгийг хураах тухай хуулиа батлуулмаар байна.