Сэтгүүлч Г.Уянга 2000 оноос хойш үеийн хамгийн нэртэй сэтгүүлчдийн нэг. 2012-2016 онд УИХ-ын гишүүн байсан. Харин 2016 оны УИХ-ын сонгуулийн үеэр тухайн үеийн УИХ-ын гишүүн Л.Эрдэнэчимэгтэй холбоотой бичлэг задарч, энэ бичлэгийг Г.Уянга тараасан гэсэн гүтгэлэг тарж, хоёр бүсгүйг давхраар нь “намнан” унагаж байлаа. Энэ бичлэгийг Х.Бат-Ялалт, Т.Алтаншагай хоёр анх задлан хэвлэлийн хурал хийж, Л.Эрдэнэчимэгийн насан туршийн зээл” хэмээн өгсөн 50 сая төгрөгийн баримтыг ч ил үзүүлсэн билээ. Тухайн үед УИХ-д нэр дэвшиж байгаа Н.Учрал үнэ цохин авсан гэсэн цуу яриа гараад намжсан. Юутай ч энэ бичлэгээс болж хамгийн их шүүмжлүүлсэн хүн нь Г.Уянга. Сэтгүүлч Г.Уянга үе том том асуудалд ордог, хатуу хөтүү үгийг харамгүй сонсдог ч шүүх цагдаа гэж явдаггүй. Харин энэ удаа нэлээн жинтэй пост бичжээ. Хэнд хаягласнаа ил хэлээгүй ч улс төр сонирхдог, мэдээлэлтэй хүний анхаарлаас гадуур гармааргүй үгийг экс гишүүн Г.Уянга бичжээ.
Тэр хүнд байгаа гэнэ. Түүний тухай хэсэг бодол үелзэв. Жирийн үед бол нэрийг нь ч сонсох дургүй. Тааралдахаараа зам бууруулдаг. Аргагүй тулгарвал тэр мэндэлдэг, би хүйтнээр толгой дохисон болдог. Зүгээр л дургүй! Яагаад гэдгийг тэр хамгийн сайн мэднэ!
Харин одоо бол… Хөөрхий дөө, хүн болж босоосой гэж үнэнээсээ бодож, залбирч байна! 
Амьдрал баян, сайн, муу аль ч үйлийн үр хэзээ нэгэн цагт заавал урган дэлбээлэхээ мартдаггүй нь юуны учир?!
Эрх мэдлийн төлөө улайран, бусад хүний нэр төрийг гутаан дэвсэлж, юу ч биш болгож болно гэж үү дээ?! Үхэхэд нь хүртэл үлдээд хоцордог, яс нь хувхайрсан ч яригдаж л байдаг НЭР ТӨР гэдэг ямар эрхэм чухал зүйл болохыг тэд мэддэггүй гэж үү?! Ядаж ар гэр, үр хүүхдийг нь өөрийнхтэйгээ зүйрлэж бодож чаддаггүй гэж үү, тэд?! Хүнийг яаж ч болохгүй зовлон шаналалд унагаад түүн дээр дөрөөлж эрх мэдэлд очих ерөөсөө ч сайхан биш, харин ч хамгийн адгийн араншин!
Даан ч харамсмаар ядуу сэтгэл…
Сонгуулийн үеэр элдэв бичлэг бариад ирдэг хүмүүс зөндөө, “Эгч нь ийм аргаар өрсөлддөг хүн бишээ!” гээд л явуулдаг. Залуу хүнд яагаад ийм сэтгэл байдаггүй юм бол доо, яагаад байсангүй вэ?!…
Үнэн яах вэ, ард үзэгдсэн ч босоод ирнэ. Цаг хугацааны шалгуур даах учраас сэтгэл тайван. Харин худал л тарчилж амьдрах байх даа, хөөрхий…
Идсэн эрүү хувхайрч идүүлсэн бут ургадаг!
Нэгний нь дур гутам сэжгийн бичлэг задарч улстөрөөс явчих шиг боллоо, гэсэн ч хүн хорлосон түүний сэтгэл амгалан байдаг болов уу, яадаг бол?! Бас нэг нь шоронд…
Нөгөө нь… Амаргүй л байгаа сураг дуулдана. Гэхдээ эдгэрч босоосой доо гэж чин сэтгэлээсээ залбиръя
Өс санадаггүй юмаа, угаасаа эмэгтэй хүн, эх хүн чадах ч биш. Зүгээр л бодохоос гомдож харамсаад байдаг юм…
Та нар чинь ЭР ХҮМҮҮС биш юмуу?! /Яахав, зарим нь биш байсан л даа!/
Хүний зовлон шаналлын шалтгаан биш аз жаргал, баяр баяслын шалтгаан болж, түүний үрийг цацаж явбал хичнээн сайхан бэ?Амьдрал богинохон шүү дээ…
Ухаарсан сэхээрсэн хийгээд мунхаг давчуу ялгалгүй бүхнийг бурхан өршөөг!
Discussion about this post