Зууны манлай хос дуучин С.Вандан, Д.Дуламсүрэн хоёр 1996 онд дуулж эхэлсэн он жилээсээ хойш улсад оруулсан орлогоо тооцож үзэхэд, Төв аймгийн театрын төсөвт 69.8 сая төгрөгийн орлого тушааж “рекорд” тогтоожээ. Хөлөөрөө хөдөө орон нутгаар тойрч, хоолойгоороо дуулж олж ирсэн мөнгө нь аймгийн театрын цалин тавих, тохижилт хийх зэрэгт зарцуулагддаг байжээ. Тэгэхээр яах аргагүй Төв аймгийн төдийгүй Монгол Улсын соёлын салбарт жинтэй хувь нэмэр оруулсан гэр бүл мөн билээ. Тухайн үед хүүхэд 1 төгрөг, том хүн 3 төгрөгөөр тоглолт үздэг байв.
Социализмын үед анхлан дуулж, шинэ нийгэмд нийтийн дууны салбарт цахиур хагалан орж ирсэн Төв аймгийн харьяат зууны манлай Монголын анхдагч хос дуучин МУГЖ С.Вандан, Д.Дуламсүрэн нарыг Төв аймгийн соёлын элчээр сонгожээ. Тэд Төв аймгийн театрт танилцан 1977 онд гэр бүл болсноор нийтийн дууны салбарт нэгэн сайхан хос дуучин гэр бүр мэндэлсэн.
1979 онд “Ардын ая дуу” хэмээх анхны тоглолтоо хийснээс хойш 40 гаруй удаагийн бие даасан тоглолтыг зохион байгуулж олон нийтийн хүртээл болгожээ. Монгол орны бүх аймаг, сум, суурин газруудаар тоглолтоор явсан км-ээ тооцож үзэхэд дэлхийг 6 удаа тойрсонтой тэнцэх хэмжээний замыг туулжээ.
МУГЖ Д.Дуламсүрэн “1974 онд Соёлын яамнаас бүх ард түмний урлагийн үзлэгт Лүн сумаас шалгарч аймгийн Соёлын Ордонд хөгжимчнөөр ажилд орж байсан. Түүн дээр анх дуулж, түүнээс хойш одоог хүртэл үр минь ч дууллаа, үрийн үр ч дуулж л явна. С.Вандан бид хоёр бол хамгийн анхны хос дуучид, хамгийн анх хоёр хүний тоглолт хийж байсан. Үүгээрээ бас их бахархаж явдаг. 1977 онд С.Вандан бид хоёр хамгийн анх “Ханьсах заяа” нэртэй дуу гаргаж байлаа. Энэ дуу маань одоо хүртэл олны сонорт хүрдэг болохоор миний хамгийн хайртай уран бүтээлүүдийн маань нэг юм. Бид хоёр удахгүй шинэ уран бүтээлээ цацна, хоолойгоо уншчихсан, дүрсжүүлэх дутуу байгаа” гэлээ.
()
Discussion about this post