“Эрдэнэс силвер ресурс” ХХК Дундговийн Их газрын чулуунд 50 ширхэг Монгол тарвага нутагшуулав

Цөлжилт, хүний буруутай үйл ажиллагаанаас Дундговь нутагт өмнө нь олноор байсан тарвага ховордож устах аюулд өртсөн байна. Биологийн олон янз байдлыг дүйцүүлэн хамгаалах арга хэмжээг төлөвлөн хэрэгжүүлэх ажлын хүрээнд 2022 оны 06 дугаар сарын 19-ний өдөр Их газрын чулуу байгалийн цогцолборт газарт 50 ширхэг Монгол тарвагыг амжилттай нутагшууллаа.

“Эрдэнэс силвер ресурс” ХХК, Байгаль орчин, аялал жуулчлалын яам, Дундговь аймгийн Засаг дарга, Их газрын байгалийн цогцолборт газрын хамгаалалтын захиргаатай хамтран Хустайн байгалийн цогцолборт газраас зэрлэг амьтдын нөөцийн хомсдлыг бууруулах, экологийн тэнцвэрт байдлыг хамгаалах зорилгоор тарвагыг зөөвөрлөн авчирч нутагшуулсан.

Уг ажил нь ан амьтдын орчныг хамгаалах, нөхөн үржихэд чиглэсэн ажил бөгөөд орон нутгийн байгууллагуудтай зөвшилцөн, уялдан ажиллаж үр дүнд хүрч буй сайн жишээ болж байна

Тарвага нь цөлжилтөөс урьдчилан сэргийлэх, газрын хөрсийг сийрэгжүүлэх, ургамлын гарцыг нэмэгдүүлэх зэрэгт чухал үр нөлөөтэй амьтан учир бүс нутгийн биологийн төрөл зүйл нэмэгдэж, экологийн тэнцвэрт байдлыг хадгалахад ихээхэн ач холбогдолтой юм.