Австрали улсын засгийн газар цар тахалд нэрвэгдсэн Энэтхэгээс эх орондоо буцаж ирэхийг оролдсон иргэддээ хатуу шийтгэл оноохоор болжээ. Австрали улс Энэтхэгээс иргэдээ татаж авах тусгай үүргийн нислэг болон ердийн нислэгийг тавдугаар сарын 15 хүртэл зогсоох шийдвэр гаргасан байна. Ингэснээр Энэтхэгт байгаа Австралийн 9,000 гаруй иргэн хүнд байдалд оржээ. Тэдгээрийн 650 нь эрсдэлтэй бүлэгт багтаж байгаа аж.
Гэтэл өнгөрсөн Пүрэв гарагт Австралийн крикетийн хоёр тамирчин Катараар дамжин эх орондоо буцаж ирсэн нь Засгийн газрынхаа хоригийг зөрчсөн хэрэг. Тиймээс Даваа гарагаас эхлэн Австралийн засгийн газар Био Аюулгүй байдлын хуулийн хүрээнд онцгой арга хэмжээ авч, хилийн хоригоо улам чангатгахаар болжээ. Австралид Энэтхэгээс ямар нэг замаар буцаж ирэхийг оролдсон хүн бүрт 66,000 австрали долларын торгууль оноох, эсвэл тав хүртэл жил шоронд хорих ял оноохоор болсон байна. Хэрвээ улс орныхоо био аюулгүй байдалд ноцтой хохирол учруулсан гэж үзвэл дээрх хоёр шийтгэлийг давхар оногдуулахаар болжээ.
“Засгийн газарт энэ шийдвэрийг гаргахад хэцүү байлаа. Гэхдээ Австралийн ард иргэдийн эрүүл мэндийг хамгаалах, коронавирусийн цар тахлыг хяналтаасаа алдахгүй байхын тулд ингэх шаардлагатай юм” гэж тус улсын холбооны засгийн газрын эрүүл мэндийн сайд Грэг Хант өчигдөр орой мэдэгдсэн байна.
Хатуу хориг ирэх долоо хоногийн Даваа гарагаас эхлэн тавдугаар сарын 15-ны өдөр хүртэл үргэлжлэх ажээ.
Discussion about this post