Сангийн яам хоёр жилийн өмнө гадаад хэвлэл захиалгад 5 сая төгрөг зарцуулж, олныг гайхуулж байлаа. Тэр хэвлэл нь Сангийн сайд болон Сангийн яамны ажилтан албан хаагчид заавал унших ёстой дэлхийн эдийн засаг санхүүгийн мэдээ мэдээлэл багтсан сэтгүүл байсан. Харин “Монголросцветмет” үйлдвэр тэр үеэр буюу 2019 онд гадаад хэвлэл захиалгад нийтдээ 62 гаруй сая төгрөг зарцуулсан байна. Учир нь 2019 оны эхний хагас жилд буюу 7-р сарын 19-нд “Сэтгүүл” нэрээр 31,7 сая төгрөг, үүнээс гуравхан хоногийн дараа “Ном” нэрээр мөн адил хэмжээний төгрөгийг валютаар хөрвүүлэн гадаад руу гуйвуулжээ. Монгол төгрөгөөр 62 сая төгрөгтэй дүйцэх 11918 ам. долларыг “Bank of America” –гийн Texas мужийн Dallas хот дахь салбарт шилжүүлсэн байна.
Хэтээсээ “Монголросцвемет” ТӨҮГ-ын захирал Б.Мөнхбатыг тансаглалд дуртай нэгэн гэдгийг хэвлэл мэдээллийн хэрэгслүүд ч зарласан. Б.Мөнхбат захирлын үндсэн болон гэрээний нэмэгдэл цалин, хоол, орон сууцны хангамж зэрэг нь 39 сая орчим төгрөг болдог гэж бичиж байлаа.
Уул уурхай, хүнд үйлдвэрийн сайд Г.Ёндон “Монголросцветмет” ТӨҮГ-ын орлогч захирлаар ажиллаж байх хугацаандаа албаны 10.7 сая төгрөгөөр хоёр хүүхдийнхээ сургалтын төлбөрийг төлүүлсэн байдаг. Тэрээр 2019 оны дөрөвдүгээр сард “Монголросцветмет” ТӨҮГ-ын орлогч захирлаар томилогдсоноосоо хойш таван сарын дараа хоёр хүүхдийнхээ сургалтын төлбөр болох 10,700,000 мянган төгрөгийг байгууллагаасаа буюу 2019 оны есдүгээр сарын 2-нд төлүүлжээ.
Г.Ёндон нь “Монголросцветмет” ТӨҮГ-ын орлогч захирлаар ажиллаж байх үедээ сард дунджаар 17,000,000 төгрөгийн цалин хангамжийг авдаг байсан аж. Энэ мэтээр Монросцветмет ТӨҮГ гэж удирдлагууддаа ээлтэй, мөнгийг “сул асгасан сувд” шиг зарж байдаг газар байдаг бололтой.
Discussion about this post