Сассексийн гүнгийн авхай 39 настай Меган Маркл, 36 настай ханхүү Харри хоёр дахь хүүхдээ алджээ. Жүжигчин байсан Меган Маркл гэр бүлдээ тохиолдсон сэтгэл эмзэглүүлсэн эмгэнэлт явдлын талаар ярьжээ. Марклийн хэлснээр энэ харамсалтай явдал өнгөрсөн долдугаар сард болсон байна. Тэр өдөр Меган Маркл өдрийг ердийн байдлаар эхлүүлжээ. Сэрээд нохойгоо салхилуулж, хооллож, нэг настай хүү Арчигийн хувцсыг эмхэлжээ. Хөл хүнд Меган хүү Арчигийнхээ хүүхдийн живхийг сольж байхдаа, хүнд хэлбэрийн базлалтыг мэдэрсэн гэнэ. Меган Меркл “Маш хүчтэй өвдөж байсан тул хөл дээрээ тогтож чадахгүй, Арчи-гаа тэвэрсээр шалан дээр унасан. Энэ үеэр гэрт хөгжим эгшиглэж байсан ч хөгжилтэй аялгуу нь миний мэдэрч байсан мэдрэмжээс эрс ялгаатай байлаа. Хоёр дахь хүүхдээ алдаж байгаагаа мэдээд би анхны хүүхдээ энгэртээ бүр чанга тэвэрч, гарыг нь атгаж байсан” гэж Меган Маркл ярьжээ. Ингээд Лос Анжелесийн эмнэлэгт хүргэсэн байна. Ханхүү Харри ч хэвлий дэх нялх үрийнхээ төлөө санаа зовон хамт очжээ. Харамсалтай нь үр зулбажээ. “Хэдэн цагийн турш би эмнэлгийн орон дээр хэвтсэн. Нөхөр маань миний гараас барьсаар байсан. Би уйлж нулимсандаа норсон. Тэр үед Харри намайг тэврэхэд гийн зүрх нь хүчтэй цохилохыг мэдэрсэн. Бид хүүхдээ алдаад их гашуудлаа” гэж Меган Маркл ярьсан тухай “Дейли Мэйл” бичжээ.
Их Британичууд үр зулбалтын шалтгаан нь хүнд стресс байж болно гэжээ. Меган Маркл шүүмжлэл, сөрөг байдлын давалгаанд байнга өртдөг боловч тайван байхыг хичээдэг. Сассексийн гүн, хатан хоёр Англид эргэж очих бодолгүй байна. Хосууд Харригийн үеэл дүүд өөрийн харшаа өгчээ.
Discussion about this post