Сошиал орчинд Шиан Газа нэрээр алдаршсан Кристиан Альберт Газа “BLACKPINK” хамтлагийн Женнид сэтгэлээ илчилж, YG энтертайментийн байрны ойролцоох сурталчилгааны самбарт Женниг болзоонд урьж буй урилгаа төлбөр төлөн байршуулжээ. Урилга нь Шиан Газагийн өөрийнх нь зурагтай ба “Ким Женни Руби Жэйн чамайг оройн хоолонд урьж болох уу? Намайг хамгийн аз жаргалтай нэгэн болгооч” хэмээн солонгос, англи хэлээр бичжээ. Энэ зар сурталчилгааны самбарын түрээсийн зардлыг 30 мянган ам.доллар гэжээ.
Мөн тэрээр өөрийн фэйсбүүк хуудсаараа дамжуулан сурталчилгааны самбарын зургийг нийтэлсэн нь 100 мянга гаруй хандалт, 17 мянган сэтгэгдэл, 26 мянган шэйр авчээ.
Rappler.com сайтын мэдээлснээр Шиан Газа “Би түүнтэй хэрхэн холбогдохоо мэдэхгүй байсан болохоор сурталчилгааны самбарт болзооны урилгаа байрлуулсан. Түүнээс “тийм” гэдэг хариулт сонсоно гэж найдаж байна” гэжээ.
Харин “хүслэнт” бүсгүй Женни БНСУ-ын алдарт “Big Bang” хамтлагийн ахлагч Жи Драгонтэй үерхээд жил гаруй хугацаанд болзож буй. Урлагийн ертөнцөд өөрсдийн гэсэн орон зайг эзэлж, сонсогчдынхоо хайрыг татсан хоёр уран бүтээлч хоёулаа “YG” энтертайментэд харьяалагддаг. Женни 2012 онд Жи Драгоны «That XX» дууны клипэнд тоглож байсан юм. 
Discussion about this post