Монголын цагдаагийн байгууллага гэмт хэрэгтэй тэмцэх, хэв журам хамгаалах ажилд албаны сургуультай нохойг анх 1944 оноос ашиглаж, энэ чиглэлийн мэргэжлийн боловсон хүчнийг бэлтгэж эхэлсэн. Өнөөдөр эрэлч нохойн алба үүссэний 76 жилийн ойн өдөр.
Эрэлч ноход “Монгол Улсынхаа төлөө зүтгэе” гэж хэлж чадахгүй ч үйлдлээрээ тод харуулж, олон гавьяа байгуулсан баатарлаг үнэнч нөхөд. Эрэлч нохойн хувьд гол алба нь гэмт хэрэгтнийг халуун мөрөөр нь илрүүлж, албандаа үнэнчээр зүтгэх.
Цагдаагийн ерөнхий газрын даргын 2016 оны 04 дүгээр сарын 12 өдрийн Б/180 тоот тушаалаар үржлийн хэсэг болон зохион байгуулагдаж, салбартаа анх удаа биеийн галбир цогц, дээд мэдрэлийн үйл ажиллагааны хэв шинж, үүлдэрлэг чанар, албаны идэвх зэрэг нэгдмэл чанартай нохдыг сонгон авч шинжлэх ухааны үндэслэлтэй үржүүлэн албанд тэнцэх гөлөгнүүдийг бойжуулан дотоодын нөөц бололцоо нөхөн хангалт хийн ажиллаж байна.
Тус хэсэг нь хэсгийн дарга бөгөөд малын их эмч 1, үржлийн зоотехникч 1, малын бага эмч 1, нохойн хоолны тогооч 1,нохойн маллагч 2, гөлгөн нохой маллагч 1 гэсэн орон тоотойгоор үйл ажиллагаагаа явуулж байна.
Сүүлийн жилүүдэд Герман овчарка, Дундад ази, Ротвейлер, Кавказ овчарка, Малиуна, Лаборадор, Дорнод европын овчарка үүлддрийн үржлийн эм нохдыг сонголт хийн хээлтүүлэгт оруулж нийт 45 тооны гөлөг хүлээн авч эрүүл эсэн мэнд бойжуулан эрэл мөрдлөг, хар тамхи мансууруулах бодис, тэсэрч дэлбэрэх бодис эрж хайх, харуул хамгаалалтын чиглэлээр сургалтанд хамруулан төв орон нутгийн цагдаагийн газар хэлтэс, дотоодийн цэргийн анги салбаруудад хүлээлгэн өгөөд байна.
Албаны нохой ашиглаж ижил төстөй үйл ажиллагаа явуулдаг ХХЕГ-ын албаны нохойн сургалтын төв, ГЕГ-ын эрэлч нохойн алба, ОБЕГ-ын эрэлч нохойн алба, ТТХГ-ын албаны нохойн тасаг зэрэг албадууд цагдаагийн жишгээр албаны нохойд үржил селекц хийж дотоод нөөц бололцоогоороо эрэлтээ хангах зорилт тавин ажиллаж байна. 
Discussion about this post