Авто тээврийн Үндэсний төв гэж муу нэртэй луу данстай, дарга нар нь авилгад идэгдсэн газар болсныг хэн хүнгүй мэднэ. Дарга нарынх нь халаасаа түнтийлгэх гол хэрэгсэл нь “Азын дугаар” шаглаж зарах байсан. Зарим нь бүр албаны өрөөндөө шаглаж зарж байгаад газар дээрээ баригдаж байсан удаатай.
Зам, тээврийн хөгжлийн сайд Л.Халтар томилогдсон цагаасаа эхлээд үүнийг таслан зогсоохын тулд шат дараатай арга хэмжээ авч байгаа ажээ. Тухайлбал, 2020 оны арваннэгдүгээр сард сайдын тушаал гаргаж “Автотээврийн хэрэгслийн бүртгэл хөтлөх, улсын дугаар олгох журам”-ыг шинэчлэн батласан.
Уг журамд цоо шинэ нэгэн заалт орж ирсэн нь “Сонирхол татахуйц улсын бүртгэлийн дугаарыг үнэ хаялцуулах замаар худалдан борлуулах… орлогыг холбогдох хууль тогтоомжийн дагуу тусгай санд төвлөрүүлэх” гэсэн заалт байв.
Гэтэл үүнийг зарим хүн эсэргүүцэж “Хэзээ ч бүтэхгүй зүйл” гэж байсан.
Анхны дуудлага худалдаа сүр дуулиантай болж нэг дугаар 400 гаруй сая төгрөгийн үнэд хүрсэн ч авсан нөхөр амнаасаа буцаж, явуургүй зүйл гэгчдийн бах тавыг хангаад өнгөрсөн.
Гэвч Л.Халтар сайд гаргасан шийдвэрээсээ буцаагүй. Нийтдээ “азын дугаар”-ын буюу сонирхол татсан дугаарын дуудлага худалдааг гурван удаа зохион байгуулж, УАР, УАС, УАО серийн 1161 ширхэг дугаарыг дуудлага худалдаанд оруулж, 1026 ширхэг дугаарыг нь худалдан борлуулжээ.
Дээрх 1026 ширхэг дугаарыг худалдан борлуулснаас нийтдээ 1 тэрбум, 710 сая, 650 мянган төгрөгийн орлого олж, улсын төсөвт төвлөрүүлсэн байна. Өөрөөр хэлвэл, ашигч, авлигач дарга нарын халаасанд ордог байсан, орох байсан 1.7 тэрбум төгрөг Монгол Улсын сан хөмрөгт багтсан гэсэн үг.
Энэ бол Зам, тээврийн хөгжлийн сайд Л.Халтарын санаж сэдэж, багагүй эсэргүүцэлтэй тулгаран байж хэрэгжүүлсэн, Монгол Улсад, монголчуудад шим өгөөжөө өгсөн ажлын зөвхөн нэг нь юм.
Сэтгүүлч Г.Энхбаатар
Discussion about this post