УИХ-ын гишүүн Б.Саранчимэгийн нөхөр Мөнхбаатар нь Буянт Ухаа Олон улсын нисэх буудлын захирлаар ажиллаж байсан ч ажлын чадвар гологдож, ИНЕГ-аас нь шийдвэр гаргаад халж байсан гэдэг. Гэтэл Буянт Ухаа Олон улсын нисэх буудлыг нөөц онгоцны буудлаар ашиглахаар Засгийн газраас шийдвэрлэсний дараа Д.Мөнхбаатарт зориулж шинэ бүтэц батлан, нөгөө чадваргүй нөхөрт хамгийн хариуцлагатай ажлыг бэлэглэж, Аэродроны даргаар томилчихож гэнэ. Энэ тухай нисэхийн хонхроор нэг ярьж байна.
Хөшигтийн хөндийн шинэ нисэх буудалтай болсноор баг бүрэлдэхүүн нь хоёр хуваагдаад, ажилтан ажилчдынх нь мэргэжлийн зэрэг дэв, чиг үүрэг нь өөрчлөгдөж, 180 хүний ажил амьдрал ёстой л үүрээ эвдүүлсэн шоргоолж шиг бужигнаж байгаа гэнэ. Энэ үеэр эрхэм гишүүн Б.Саранчимэгийн хайрт нөхөр нь сэмхэн албан тушаалд томилогджээ.
Б.Саранчимэг гишүүнийг Үндэсний цэцэрлэгт хүрээлэнгийн дарга байхад нөхөр нь нийслэлд нэг наст ургамал болон Үндэсний цэцэрлэгт хүрээлэнд үр, суулгац нийлүүлдэг байсан аж. Улаанбаатар хот 2013 онд 315 сая төгрөгийг нэг наст цэцэгт зарцуулж, 2014 онд гурван га талбайд 500 сая орчим төгрөгөөр нэг наст цэцэг тарьсан. Мөн 2015 онд 200 сая төгрөг зарцуулсан байгаа юм. Тэгэхээр энэ хэмжээнийн мөнгөөр Д.Мөнхбаатар ОХУ-аас цэцгийн үр, суулгац зөөдөг байжээ. Цэцгийн үр зөөж байсан Д.Мөнхбаатар 2016 онд эхнэрээ УИХ-ын гишүүн болонгуут мэргэжлийн гэх засгийн газрын эд эс нь болсон. Эхнэр нь гишүүн болоод түүнийг Чингис хаан олон улсын нисэх онгоцны буудлын “тэргүүн”-ээр томилуулж дөнгөсөн гэдгийг ярих хүмүүс байдаг. Мэргэжлийн бус томилгоо гэдгийг ч цахим ертөнцөд бичдэг байсан. Гэтэл дахиад эхнэрийн нэр нөлөөгөөр шинэ албанд очлоо гэж хүмүүс таагүй байна.
Discussion about this post