Хэнтий аймаг, Сонгино Хайрхан дүүрэг буюу УИХ-ын сонгуулийн 18, 28 дугаар тойргийн нөхөн сонгуулийн санал хураалт 2021 оны 10-р сарын 10-нд явагдахаар товлогдсон. Уг нөхөн сонгуулиудад оролцохоо улс төрийн 9 нам, нэг эвсэл илэрхийлж, СЕХ-д бүртгүүлжээ.
Эрх баригч МАН-ын хувьд хамгийн олон горилогчтой нь тодорхой. Тухайлбал Дорждугарын гишүүн хүчингийн хэрэгт холбогдсоноос хойш хуульч Л.Батжав Хэнтийд нэр дэвшихээр жилийн дөрвөн улиралд ээлжлэн эргэлдэж яваа. МАХН-ыг хүртэл “өвөртөө оруулчихсан” МАН-ынхан ганц залууг аргалах юухан байхав. 2020 оны сонгуулийн өмнөхөн МАН-д элсүүлж, Ерөнхий сайдын зөвлөх болгосон. УИХ-ын 2020 оны сонгуульд хоосон үлдсэн өмгөөлөгч Л.Батжав ахиад Хэнтийгээр явж эхэлсэн байна. Нэр дэвшихээр горилогсод ганц МАН-ын Даргын зөвлөх, өмгөөлөгч Л.Батжаваар тогтохгүй.
МАН-ын Нарийн бичгийн дарга Н.Энхбаатар, Соёлын дэд сайд М.Батбаяр, УИХ-ын гишүүн, Хэнтий аймгийн Засаг Дарга асан Н.Ганбямба, Хэнтий аймгийн МАХН-ын Түмтийн дарга асан, МАН-ын Бага Хурлын гишүүн С.Ононбаяр, УИХ-ын гишүүн асан Д.Гантулга, МАН-ын Удирдах Зөвлөлийн гишүүн Энхбаярын Батшугар нарын нэрс МАН-ын удирдлагуудын түвшинд яригдсан юм байна. Улмаар улс төрийн нөхцөл байдалтай холбоотойгоор гэнэтийн өөрчлөлт гарчихгүй л бол Монгол Улсын Ерөнхийлөгч У.Хүрэлсүхийн туслах, зөвлөхийн ажил хийж байгаад “МИАТ” ТӨК-д дэд захирлаар хэсэгхэн ажиллан, улмаар МАН-ын төв аппаратад шилжсэн Н.Энхбаатарыг Хэнтий аймаг буюу УИХ-ын сонгуулийн 18-р тойрогт болох нөхөн сонгуульд МАН-аас нэр дэвшүүлэхээр үндсэндээ санал нэгдсэн гэнэ. Үүнийг батлах мэт одоо ч Н.Энхбаатар Хэнтийдээ байж, төрсөн өдрөө тэмдэглэн найз нөхдөө цуглуулан наргиж, сонгуулийн тактикаа “найруулж” яваа.
Н.Энхбаатар Ерөнхийлөгч У. Хүрэлсүхийг 2000-2004 онд УИХ-ын гишүүн байхад туслах нь байсан. Төдийлөн олонд танигдаагүй. Нэг удаа 600 сая төгрөгийн авлигын асуудлаар саатуулагдаж хүртэл үзсэн нэгэн. Түүнийг “МИАТ” ТӨХК-ийн дэд захирал байхад 2018 оны 07 сарын 23-нд АТГ-аас баривчлан саатуулсан. Н.Энхбаатарыг бусдаас 600 сая төгрөгийн авилга авсан хэрэгт шалгасан гэх.
МАН-ын Удирдах Зөвлөлийн зарим гишүүд, Ерөнхийлөгч, МАХН-ын дарга асан Н.Энхбаярыг хүндэтгэн, ээжийнхээ төрсөн нутагт нэр дэвших сонирхол байгаа эсэхийг саналыг нь сонсох, тандахын завсар асуужээ. Гэвч Н.Энхбаяр УИХ-д нэр дэвшихгүй гэдгээ илэрхийлсэн байна.
Discussion about this post