Токио 2020 олимпод оролцоод, эх орондоо буцсан Австралийн хөлбөмбөг, рэгбигийн тамирчдын талаар Японы Japan Airlines компани Австралийн Үндэсний Олимпын Хороонд гомдол гаргажээ.
Австралийн хоёр багийн тамирчин 20 гаруй залуу Токиогоос Сидней хүрэх 10 цагийн нислэгийн үеэр архидан танхайрч, бусад зорчигчдын тав тухыг алдагдуулсан аж. Согтуу тамирчид агаарын хөлгийн ажилтнуудын шаардлагыг биелүүлэхээс татгалзаж, онгоцонд хадгалагдаж байсан согтууруулах ундааг хүчээр булаан авч ууцгаажээ. Зарим нь бөөлжиж, онгоцны бие засах өрөөг бөөлжсөөр дүүргэсэн тухай JAL компанийн гомдолд мэдээлсэн байна.
“Тамирчид улс орноо төлөөлдөг тул тэдний гаргасан зохисгүй ааш авирын мөрөөр арга хэмжээ авна гэдэгт найдаж байна” гэж JAL компанийн мэдэгдэлд өгүүлжээ.
Австралийн Үндэсний Олимпын Хороо гомдлын мөрөөр шалгалт явуулж эхэлснээ хариу мэдэгдсэн байна. “Болсон явдлын талаар сонсоод үнэхээр их сэтгэл дундуур байна. Холбогдох спортын холбоод буруугаа хүлээж, Австралийн Олимпын Багаас уучлал гуйгаад байгаа” гэж Австралийн Үндэсний Олимпын Хорооны ерөнхийлөгч Мэтт Кэррол хариу өгчээ.
Онгоцонд болсон явдлаас гадна Австралийн тамирчид буцахаасаа өмнө олимпын хотхонд архидаж, өрөөнийхөө эд зүйлсийг эвдэж сүйтгэсэн гэнэ. Тамирчид өрөөний орыг эвдэж, ханыг цөмөлж, мөн шалыг нь бөөлжсөөр дүүргэжээ.
Австралийн олимпын багийн ахлагч Ян Честермэн рэгбигийн болон сэлүүрт завины багийн тамирчид өрөөндөө архидсаныг хүлээн зөвшөөрсөн ч ямар нэг сахилгын арга хэмжээ авахгүй гэжээ. “Хана цоолсон нь үнэн. Гэхдээ энэ тийм хэцүү зүйл биш. Нэг удаагийн зориулалтаар босгосон нимгэн ханыг том биетэй тамирчид санамсаргүйгээр цөмлөх нь байж болох асуудал. Та нар ч ингэж чадна” гэж тэр тамирчдаа өмөөрсөн байна.
Discussion about this post