Хустайн байгалийн цогцолбор газар нь Төв аймгийн Алтанбулаг, Аргалант, Баянхангай сумын нутагт 50,8 мянган га газрыг хамардаг. Тус газрын менежментийг “Хустайн цогцолборт газар” төв ТББ, Засгийн гарын тогтоолын дагуу Байгаль орчин, аялал жуулчлалын яамтай гэрээ байгуулан улсын төсвийн дэмжлэггүйгээр хариуцан ажилладаг.
Орлогын 80 гаруй хувийг аялал жуулчлалаас төвлөрүүлж, Улсын төсвийн дэмжлэггүйгээр үйл ажиллагаа явуулдаг ч сүүлийн 2 жил гадаадын жуулчдын хөдөлгөөн зогссонтой холбоотой санхүүгийн хүндрэл үүсэн ч үндсэн үйл ажиллагаагаа хэвийн, тогтмол явуулж байна.
Хустайн байгалийн цогцолбор газарт БОАЖ-ын сайд Н.Уртнасан судлаач нарын хамт дэлгэрэнгүй танилцаж, биологийн төрөл зүйл, хамгаалалтын дэглэм болоод сүүлийн жилүүдэд хийгдсэн томоохон ажлууд, Ковид-19 цар тахлын улмаас тулгарч байгаа хүндрэл бэрхшээлүүд болон цаашид хэрхэн ажиллах талаар санал солилцжээ.
Хустайн байгалийн цогцолбор газарт байгаль орчны эсрэг гэмт хэрэг, зөрчлийн тоо жил дараалан буурч байгаа хэдий ч тарвага, чоно хууль бусаар агнах, агнахыг завдах тохиолдлууд гарсаар байгаа аэ. Энэ жил тарвага, чоно агнасан 2 гэмт хэрэг, завдсан 8 зөрчлийг илрүүлэн шалгаж байгааг холбогдох албаныхан танилцуулсан юм.
Баяр наадам, бүх нийтийн амралтын үеэр өндөржүүлсэн бэлэн байдалд завгүй ажиллаж байгаа Улсын тусгай хамгаалалттай газар нутгийн нийт ажилтнууд, байгаль хамгаалагчдад ажиллах нөхцөлийг сайжруулах, техник хангамжийг нэмэгдүүлэх зорилгоор хоёр мотоцикл олгохоор болжээ.
Тус газрыг байгальд устаж, нэн ховордоод байсан зэрлэг адуу Тахийг сэргээн нутагшуулах зорилгоор 1993 онд улсын тусгай хамгаалалтад авснаас хойш Тахийн тоо толгой 390 гаруйд хүрчээ. Мөн буга, тарвага, цагаан зээр болон 213 зүйлийн шувууд нутагшиж тоо, толгой тогтмол нэмэгдэж байна. Иймээс эдгээр амьтдыг үзэхээр зорин ирэх жуулчид байдаг бөгөөд Монгол орны аялал жуулчлалын гол газруудын нэг болсон юм.
Ажлын хэсгийн бүрэлдэхүүнд “Хустайн цогцолбор газар” төвийн Удирдах зөвлөлийн дарга, УИХ-ын гишүүн Н.Энхболд, хамгаалалтын захиргааны дарга Ц.Дашпүрэв, менежер Д.Өсөхжаргал, Г.Ууганбаяр, судлаач Ц.Батзаяа, Т.Намуулин нар оролцлоо.![](http://taiz.mn/wp-content/uploads/2021/07/Tahii.jpg)
![](http://taiz.mn/wp-content/uploads/2021/07/Tahii.jpg)
Discussion about this post