Ердөө хагас жилийн өмнө Эрээн-Улаанбаатар хооронд ачаа тээвэрлэх төлбөр 7000 юань байжээ. Энэ нь сар бүр өссөөр одоо 25 мянган юаньд хүрсэн байна. Өнгөрсөн тавдугаар сарын сүүлээр Шадар сайд С.Амарсайхан Замын-Үүд суманд албан томилолтоор ажиллаж, Хятадын талтай Замын-Үүд боомтоор нэвтрэх ачаа тээврийн урсгалыг нэмэгдүүлэх талаар ярьсан. Харамсалтай нь, Шадар сайдыг ирээд явсны дараа тус боомтод ачаа тээвэрлэх төлбөр 35 мянган юань болж огцом өсчээ.
Түүний дараахан Зам, тээврийн сайд С.Халтар Замын-Үүдэд очсон. Салбарын сайд буцсаны дараа дээрх үнэ 45 мянган юаньд хүрсэн аж. Энэ сарын эхээр Ерөнхий сайд Л.Оюун-Эрдэнэ тэнд очиж байдалтай танилцаад ирсэн. Ерөнхий сайдыг явсны дараа ачаа тээврийн үнэ 60 мянган юань болж өссөн. Саяхан Хууль зүй, дотоод хэргийн сайд Х.Нямбаатар камертай очиж бужигнуулсны дараа бүр 80 мянган юань болж огцом нэмэгджээ.
Өнөөдрийн байдлаар Эрээн-Улаанбаатар чиглэлд ачаа тээвэрлэх төлбөр 100 мянган юань болоод байгаа гэнэ. Тиймээс том дарга нар л битгий ирээсэй гэж том тэрэгний жолооч нар халаглаж байна.
Discussion about this post