Өнөөдөр Монгол Улсын Ерөнхийлөгч Х.Баттулга ЦЕГ-ын дарга, Дотоодын цэргийн командлагч асан, хошууч генерал Чимэддоржийн Амарболдын цолыг сэргээн олголоо.
Ерөнхийлөгч Х.Баттулга зарлиг гаргаж 2018 оны дөрөвдүгээр сард цолыг нь хасахаар шийдвэрлээд байсан юм. Харин сэнтийгээсээ буухын өмнө Ерөнхийлөгч Х.Баттулга энэ шийдвэрээ эргэн харж, 2008 оны долдугаар сарын 1-ний гэх хэрэгт ял шийтгүүлсний дараа дахин цолыг нь хураах шийтгэл оноосон нь буруу гэж үзсэн байна.
Ч.Амарболдод генерал цолыг сэргээн олгох үеэрээ Ерөнхийлөгч Х.Баттулга хэлэхдээ “Монголын төр тусгай алба хаагчдаа үүрэг, даалгавар өгчихөөд дараа нь түүнийг биелүүлснийх нь төлөө буруутгаж, цолыг нь хураадаг явдлыг ахин гаргахгүй байх нь зүйтэй юм. Дээд албан тушаалтнуудынхаа өгсөн тушаалыг гүйцэтгэснийнхээ төлөө хариуцлага, шийтгэл хүлээсэн дээр нь генерал цолыг хурааж давхар шийтгэсэн нь зохимжгүй шийдвэр байсан гэж үзэж байна. Зүй нь тушаал өгсөн дээд албан тушаалтан зохих хариуцлагаа хүлээх ёстой.
Төрийн тусгай даалгавар, онцгой үүргийг үг дуугүй биелүүлэх тангарагтай тусгай алба хаагчдыг хамгаалах, ажиллах нөхцөл боломжоор хангах, нийгмийн асуудлыг нь шийдвэрлэх зэрэг нь төрийн хэнтэй ч хуваалцашгүй үүрэг юм.
Мөнх тэнгэрийн хүчин дор Монгол цэргийн алдар бадартугай” гэсэн юм. Ч.Амарболдод 1996 оны наймдугаар сард хошууч генерал цол олгосон билээ.
Discussion about this post