УИХ-ын гишүүн, Хууль зүй, дотоод хэргийн сайд Х.Нямбаатар баруун аймгуудад ажиллаж байна. Ерөнхийлөгчийн сонгуулийн сурталчилгаатай зэрэгцэн ийнхүү Х.Нямбаатар хөдөөгүүр явах болсон нь нэр дэвшигч У.Хүрэлсүхийг дэмжиж яваа бололтой. Гэвч УИХ-ын гишүүн, Засгийн газрын гишүүн Х.Нямбаатарын биеэ авч яваа байдал, хүмүүстэй харилцах хандлага иргэдийн бухимдлыг төрүүлж, “Төрийн хүний шинжгүй яасан сагсуу ойворгон хүн бэ” гэж сууна. Тэр тусмаа өмнө орон нутагт ирсэн Төрийн гурван өндөрлөгүүдээс илүү сүр бараатай, олон харуул хамгаалалттай байсан гэнэ.
ХЗДХ-ийн сайд Х.Нямбаатар “Хууль зүй, дотоод хэргийн сайдаар томилогдсоноосоо хойш орон нутаг дахь анхны томилолтоо Говь-Алтай аймгаас эхлүүлсэн, Ховд аймагт, Баян-Өлгий аймагт ажиллаж байна. Аймгуудад ажиллах үеэр цагдаа, шүүхийн шийдвэр гүйцэтгэх байгууллага, Шүүхийн шинжилгээний алба, Улсын бүртгэлийн хэлтэс болон аймгийн Архивын тасгийн хамт олонтой уулзаж, ажлын нөхцөл байдалтай нь танилцаж, тулгамдаад байгаа зарим асуудлыг газар дээр шийдвэрлэх, хууль зүйн салбарт хийж буй хөрөнгө оруулалтыг орон нутагт жигд хүргэх, алба хаагчдынхаа ажиллах нөхцөл байдлыг сайжруулахад анхаарч ажиллаж байна” гэлээ.
Уулзалтын дараа Хууль зүй, дотоод хэргийн яам, Улсын бүртгэлийн ерөнхий газар болон БНСУ-ын Солонгосын олон улсын хамтын ажиллагааны байгууллага “КОЙКА”-тай хамтран хэрэгжүүлж буй “Улсын бүртгэлийн байгууллагын дэд бүтцийг хөгжүүлэх замаар иргэдэд төрийн үйлчилгээг цахим хэлбэрээр хүргэх” төслийн хүрээнд шийдэгдсэн суурин компьютер, олон үйлдэлт принтер, хурууны хээ уншигч, зургийн аппаратыг Улсын бүртгэлийн хэлтэст гардуулсан байна.
Үүнээс гадна аймгийн Цагдаагийн газрын албаны хэрэгцээнд зориулж “УАЗ-Фургон” маркийн автомашин, 2 мотоцикл, зарим алба хаагчдад гэр олгожээ.
Discussion about this post