“Эрдэнэт үйлдвэр” 100 сая төгрөгөөр чавга, чангаанз авах нь…

“Эрдэнэт Үйлдвэр” төсвийн мөнгө ёолдоггүй, уйлдаггүй гэдгийг  харуулдаг газар. Тэтгэвэрт гарах ёстой ч Ардын намын буянаар тус үйлдвэрийн Ерөнхий захирлаар томилогдсон Хоохорын Бадамсүрэн охиныхоо сургалтын төлбөрт зориулан 102 сая төгрөг үйлдвэрийн мөнгөнөөс шилжүүлсэн.  “Эрдэнэт үйлдвэр”-ийн удирдлагууд Токио 2020 олимпийн тоглолт үзнэ гээд  аяллын зорилгоор 326 сая төгрөг шилжүүлсэн. Олимп болоогүй, тэгээд ч олон нийтийн хараанд орсон учраас тасалбараа цуцалсан байлгүй дээ.

Мөн Х.Бадамсүрэнгийн удирдаж буй тус компани 52,000,300 төгрөгөөр массажны сандал авсан байдаг. Тэрчлэн хагас тэрбум төгрөгөөр  “Жи класс” загварын автомашин авахаар тендер зарлаж байв.

Цар тахлын хүнд үед тэвчиж болохуйц зардлуудаа тэвчихийг яам, агентлаг, төрийн өмчит аж ахуйн нэгжүүдэд анхааруулсаар байтал тэвчиж болох зардлыг “Эрдэнэт Үйлдвэр” урсгасаар, гаргасаар байгаа юм.

Тухайлбал, Төрийн худалдан авах ажиллагааны цахим систем дэх “Эрдэнэт Үйлдвэр”-ийн хүнс худалдан авах тендерийн жагсаалтыг харахад:

• Чангаанз: 37,050,000 төгрөг
• Зэрлэг жимс: 14,652,933 төгрөг
• Хар чавга: 48,165,000
• Даршилсан мөөг: 48,450,007 төгрөг
• Майонез: 48,449,991 төгрөг
• Шилтэй алаг салат: 29,853,342 төгрөгөөр худалдан авахаар тендер зарлажээ.

Худалдан авахаар тендер зарлаад буй эдгээр хүнсний бараа, жимс, жимсгэнэд 230-аад сая төгрөг зарцуулахаар төсөвлөжээ. Үүнээс чангаанз, хар чавга, зэрлэг жимс худалдан авахад 99,867,933 төгрөг зарцуулах аж. 

Монгол Улс 2012-2019 он хүртэлх долоон жилийн хугацаанд цэцэрлэгийн хүүхдийн хоолны зардлыг нэмэлгүй, 1650 төгрөгт барьж байсан.  Харин 2019 онд 50 хувиар нэмлээ хэмээн сүржин зарлаж, 2475 төгрөг болгож байв. Бяцхан хүүхдүүд “Эрдэнэт үйлдвэр”-ийн ажилтан, удирдлагуудын хажууд “шүдний завсар орсон мах, шүлсээрээ хооллож” явна гэхэд хатуудахгүй.