Монгол зураачийн бүтээл Швед улсад хулгайд алдагдсан хэрэг өнгөрсөн жил гарсан. Хулгайд алдагдсан бүтээл нь МУЭ-ийн шагналт, чөлөөт уран бүтээлч Ч.Солонгын “Хийморь” гэж нэрлэсэн орчин үеийн уран зураг юм. 130х160 хэмжээтэй энэ бүтээлд зураач солонгын долоон өнгийг мориор дүрсэлжээ. Гадаадын улс орнуудад монгол зураачийн бүтээл тэр бүр хулгайд алдагдаж байсан удаа үгүй. Энэ нь хэдийгээр хулгайн хэрэг боловч Монгол зураачийн бүтээл дэлхийд үнэлэгдэж байгаагийн нэг илрэл гэж болох юм.
Гадаадад монгол зураачийн бүтээл алдагдсан нь анхных. Гэхдээ дотооддоо манай нэртэй зураачдын сод бүтээл хулгайд алдагдсан нь нэг бус. Занабазарын нэрэмжит Дүрслэх урлагийн музейгээс монгол зургийн аргаар урласан бурхадын хөргүүдийг 1990-ээд оноос эхлэн хулгайд алдаж эхэлжээ. Тухайлбал Уран зургийн галерейн сан хөмрөгөөс 1999 онд Д.Уртнасангийн “Мандухай цэцэн” /65х40/ хөрөг, 2009 онд Б.Чогсомын “Улаанбаатар” 134х103 уран зураг алдсан нь одоог хүртэл олдоогүй байна. Бүр сүүлдээ төрийн харуул хамгаалалт бүхий Их тэнгэр дэх цогцолбороос нэрт зураачдынхаа 34 бүтээлийг хулгайд алдсан хэрэг гарсан. Аргаа барсан хүн аавынхаа толгойг маажна гэгчээр тэр хэрэгт Ерөнхийлөгч байсан хүнийг холбогдож, хоёр жилийн өмнө сүр дуулиантай шалгасан ч таг чиг боллоо.
Түүнчлэн Дүрслэх урлагийн музей, Уран зургийн галерейн сан хөмрөгт хадгалагдаж буй урлагийн сор бүтээлүүдийн ихэнх нь хуулбар болсон байгаа талаар мэдээлэл гардаг ч баталж нотолж, уран бүтээлчдийн эргэлзээг тайлсангүй. Монголын цагдаа, холбогдох байгууллагууд өнөөдрийг хүртэл дээрх бүтээлүүдийг хайсаар 20 гаруй жилийн нүүрийг үзэж байна. 
Discussion about this post