Шүүхийн шийдвэр гүйцэтгэх газрын саатуулах байранд коронавирусийн халдварын дэгдэлт гарч, тэнд байсан 285 хүний 117 хүний ковидын халдвар нь батлагдсан гэж Шадар сайд С.Амарсайхан хэллээ. Мөн саатуулах байрнаас гарах хүмүүсийн тухай “Баривчлах хугацаа нь дуусаж, гарах болсон хүмүүсийг хяналтад авсан. Тодорхой ажиглалтуудыг хийж буй бөгөөд гарах үед нь шинжилгээ авч, гэртээ гарсныг нь дараа ажиглах арга хэмжээ авна. Тиймээс тэдгээр хүн халдвар тараах эрсдэл байхгүй” гэж ЭМЯ-ны хэвлэлийн ажилтан ярив.
Энэ бол Ковид 19 өвчин зөвхөн хотын төвд гараад гэр хороололд огт гарахгүй байна гэдэг нь худлаа гэсэн үг. Өөрөөр хэлбэл гэр хорооллын зарим эрсдэлт бүлгийн хүмүүс, архины хамааралтай хүмүүс шинжилгээ өгч чадахгүй байгаа л хэлбэр. Архины хамааралтай хүн хэзээ ч сайн дураараа шинжилгээ өгөхгүй. Өгье гэсэн ч аль хэдийн оочер нь дууссан.
ШШГЕГ-ын баривчлах саатуулах байранд зөрчил гарган саатуулагдан баривчлагдсан хүмүүс ихэвчлэн согтуугаар гэр бүлийн хүчирхийлэл үйлдсэн этгээд, мөн согтуу машин жолоодсон хүмүүс байдаг. Тэгэхээр ШШГЕГ-ын баривчлан саатуулах байранд ирэхээсээ өмнө бараг бүгд эрүүлжүүлэх байраар ороод гарсан байх. Эрүүлжүүлэхэд цуг хоноод гарсан хүмүүсийн цөөн хувь нь саатуулах байранд ирдэг, бусад нь бүгд сул чөлөөтэй яваа. Одоо ч архиа хувааж уугаад халдвар тарааж байх эрсдэлтэй.
Эрүүлжүүлэх байрны цагдаа, дуудлагын алаг машины цагдаа, бүгд эрсдэлт нөхцөлд ажиллаж байна. Согтуу хүн маск зүүж архи уудаггүй. УОК , НОК-ийн дарга нар аа, архины хамааралтай нөхөд бүгд гэр бүлтэй, архины хамтрагчтай байдаг. Эрүүлжүүлэх саатуулах байранд ажиллаж байгаа ШШГГ-ын ажилтан болон цагдаа нар бас ардаа гэр бүлтэй үр хүүхэдтэй хүмүүс.
Гэвч ийм ЭРСДЭЛ байгаад байхад УОК шадар сайд Амарсайхан архийг хориглох ямар ч арга хэмжээ аваагүй. Хотын дарга Сумьяабазар архи бол хүнс гээд архи уух нь хүний эрх , хүний ухамсар нь гээд зөнд хаясан. Гэтэл архины хамааралтай хүмүүсийн зөвхөн илэрсэн хэсгээс ийм том эрсдэл үүссэн байгааг энэ тоо баримт харуулж байна.
Discussion about this post