Чех улсын хамгийн баян хүнд тооцогддог Петр Келлнер өнгөрсөн Бямба гарагт АНУ-ын Аляска мужид нисдэг тэргээр зорчиж яваад осолдож нас баржээ. Уг ослоор нийт таван хүн нас барж, амьд үлдсэн нэг хүний биеийн байдал хүнд байгааг мэдээлсэн байна. Тэд өндөр уулнаас цанаар гулгахын тулд нисдэг тэргээр өгсөж явжээ. Нисдэг тэргийг Аляскын Tordrillo Mountain Lodge дээд ангиллын амралтын газар үйлчлүүлэгчдэдээ зориулан захиалсан юм байна. Осолдсон хүмүүс нь амралтын газрын гурван үйлчлүүлэгч, хоёр хөтөч, нисдэг тэрэгний жолооч байжээ.
56 настай Келлнер нь PPF Group хөрөнгө оруулалтын компанийн үүсгэн байгуулагч. Тэрбээр Чех улсынхаа тэргүүн баян төдийгүй Европын хамгийн баян хүмүүсийн нэгт тооцогддог. Келлнерийн хөрөнгийн хэмжээг Форбс сэтгүүл 17.5 тэрбум доллар, Блүүмбэрг агентлаг 15.7 доллар тэрбум гэж тооцсон байдаг. Анх оффисын бизнес эрхэлдэг байсан Келлнер сүүлд энэ бизнесээ барьцаалан 1 сая долларын зээл авч, улсынхаа даатгалын томоохон компанийн хувьчлалд оролцон хяналтын хувийг нь эзэмших болжээ. Эндээс тэрбумтан болох замнал эхэлсэн байна.
Амралтын газрын захиргаа 17 жилийн түүхэнд нь анх удаа ийм эмгэнэлт явдал тохиолдсон тухай мэдээлээд талийгаачдын ар гэрийнхэнд эмгэнэл илэрхийлжээ. Тус амралтын газраар үйлчлүүлэгч 15,000 доллар төлөөд нэг долоо хоног амрахдаа нисдэг тэргээр уулын өндөрлөг цэгт хүрч, цанаар гулган буух боломжийг эдэлдэг аж. Мэргэжилтнүүд Airbus AS 350-B3 нисдэг тэрэгний ослын шалтгааныг шалгаж эхэлжээ.
Discussion about this post