Морьтон анчид ба шонхрын дайралт

Энэхүү “Mounted Huntmen with Falcon Striking a Swan” бүтээл нь морин дээрээс шонхор тавьж хун агнах агшныг дүрсэлсэн ховор торгон зураг юм. Өнөөдөр АНУ-ын Smithsonian National Museum of Asian Art-ын сан хөмрөгт хадгалагдаж байна.

Зургийн төв хэсэгт цагаан морь унасан ахлагч анчин тайван ажиглан зогсох бол алсын өндөрлөгт өөр нэгэн морьтон бүрэн давхиж, шонхроо агаарт тавин хун руу чиглүүлжээ. Тэнгэрт нисэх хунгууд сандран тархаж, шонхор олзоо мөрдөн доош шумбан дайрах тэрхүү мөчийг зураач гайхалтай хөдөлгөөнтэйгээр буулгасан байна.

Энэ бүтээлд:

2 морьтон

2 морь

1 шонхор

4 хун

дүрслэгдсэн бөгөөд нүүдэлчдийн шонхорын ангийн ур чадвар, морь унах чадвар, ангийн тактикийг харуулдаг.

Анхаарал татах нэгэн дүр бол цагаан морьтой ахлагч юм. Түүний өмссөн нарийн хээтэй дээл, нум сум, ирвэсийн арьсан саадаг, мөн морины гоёмсог тоноглол нь тухайн үеийн язгууртан анчдын зэрэг зиндаа, сүр хүчийг илтгэнэ. Харин дээд хэсгийн давхиж буй морьтон бол ангийн шийдвэрлэх мөчийг гүйцэтгэгч бөгөөд шонхроо тавин олзоо онилж буй хөдөлгөөн нь бүх бүтээлийн оргил цэг болжээ.

Уран бүтээлч өргөн уудам тал нутаг, намхан толгод, салхинд бөхийсөн мод, нисэн одох хунгуудыг ашиглан нүүдэлчдийн ан агнуурын уур амьсгалыг маш амьд мэдрүүлдэг. Морь, хүн, шонхор гуравын төгс зохицол нь олон зууны турш уламжлагдсан тал нутгийн ангийн соёлыг илэрхийлдэг.

Бүтээлийн мэдээлэл

Нэр: Mounted Huntmen with Falcon Striking a Swan

Монгол утга: Шонхроор хун агнаж буй морьтон анчид

Он цаг: XVII–XIX зуун

Гарал: Хятад

Материал: Торгон дээр бэх, өнгөт будгаар зурсан зураг

Зургийн хэмжээ: 94.6 × 67.5 см

Хадгалагдаж буй газар: Smithsonian National Museum of Asian Art, Вашингтон, АНУ

Бүртгэлийн дугаар: F1911.533

Энэхүү бүтээл нь зөвхөн ан агнуурын нэгэн агшныг бус, Монгол-Татар гаралтай морьт анчдын шонхорын ангийн уламжлал Зүүн Азийн дүрслэх урлагт ямар өндөр байр суурь эзэлж байсныг харуулсан үнэ цэнтэй түүхэн баримт юм. Морь, шонхор, анчин гурвын нэгдэл нь нүүдэлчдийн соёл иргэншлийн салшгүй хэсэг байсныг энэ зураг өнөөдөр ч бидэнд өгүүлсээр байна.

Old Bird Distillery