“Женко Тур Бюро”-ийн нярав залуу орлогын 46 сая төгрөгөөр цахим мөрийтэй тоглоод алджээ

“Женко Тур Бюро”-ийн нярав залуу орлогын 46 сая төгрөгөөр цахим мөрийтэй тоглоод алджээ

30 настай Б.Пүрэв-Очир нь Төв аймгийн Эрдэнэ сумын нутаг дэвсгэрт үйл ажиллагаа явуулдаг “Женко Тур Бюро” ХК-ийн нярваар ажиллаж байхдаа албан тушаалын байдлаа ашиглаж Чингис Хааны морьт хөшөө цогцолборын үйл ажиллагааны бэлэн мөнгөний орлогыг 2024 оны 02 дугаар сарын 16-аас 4 дүгээр сарын 05-ны өдрийн хооронд хувьдаа завшиж нийт 46,650,500 төгрөгийн хохирол учруулсан гэмт хэрэгт яллагджээ. Хэрэгт авагдсан баримтаар няравт 7-14 хоног тутамд кассын ажилчид хүлээлгэж өгч хэвшсэн буюу байгууллагын дотоод зохион байгуулалтаар байгууллагын нярав тус бэлэн мөнгөний орлогыг хүлээн авч хадгалж улмаар компанийн дансанд тушаадаг байжээ. Тэрээр “Би орлогын мөнгийг цахим мөрийтэй тоглоом тоглоод алдсан, Хоёр удаа 20,000,000, 20,000,000 төгрөгөөр тоглоод алдсан” гэж мэдүүлжээ. Тэрээр 72 цаг цагдан хоригджээ. Шүүх экс няравд нэг жил хорих ял оноож 46 сая төгрөг гаргуулж “Женко Тур Бюро” компанид олгуулахаар шийдвэрлэжээ.