Амралтын өдөр Сиднейн далайн эргийн Бондай амралтын газарт болсон халдлагын үеэр зэвсэгт этгээдүүдийн нэгийг үйлдэл дээр нь зогсоож, бууг нь булааж чадсан баатарлаг иргэнд gofundme платформоор дамжуулан өгсөн хандивын дүн 2.4 сая ам.доллар давжээ.
Австралийн баатраар тодроод буй эрхмийг Ахмед Аль Ахмед гэдэг. Өдгөө 43 настай, хоёр хүүхдийн аав, бөгөөд 2006 онд Сири улсаас Австралид цагаачлан ирсэн юм байна. Халдагч руу дайрах үедээ тэрбээр 4-5 удаа буудуулж шархадсан тул олон удаагийн хагалгаанд орохоор байгаа ажээ.
Хандивын аянд одоогоор 40 мянга гаруй хүн нэгдсэн бөгөөд хамгийн өндөр дүнтэй буюу 99,999 ам.долларын хандивыг Pershing Square Capital Management-ийн Гүйцэтгэх захирал, тэрбумтан Билл Экман өгсөн байна.
Ахмед аль Ахмедийн зоригт үйлдлийг АНУ-ын Ерөнхийлөгч Дональд Трамп, Австралийн Ерөнхий сайд Энтони Албаниз тэргүүтэй удирдагчид магтаж, хүндэтгэл илэрхийлсэн юм.
Discussion about this post