Дэлхийд хөрөнгөөрөө 2 дугаарт жагсдаг АНУ-ын тэрбумтан Жеф Безос өнөөдөр Мексик гаралтай, телевизийн хөтлөгч Лорен Санчестэй алдарт Венец хотод хуримаа хийж байна. Энэ нижгэр хуриманд Леонардо Ди Каприо, Иванка Трамп нөхөртэйгөө, Ким Кардашиан ээж, эгч дүүсийн хамт, Мик Жаггер зэрэг 200 зочин уригдсан. Амазоны үүсгэн байгуулагч, технологийн аварга компанийн эзэн 61 настай тэрбумтны сэтгэл зүрхийг эзэмдсэн бүсгүй хэн бэ?
Лорен Санчес Мексикт төрж, Калифорнид өссөн, цагаач гэр бүлээс гаралтай. Эмээ нь айлын гэр цэвэрлэж, охин хуучин машины арын суудалд унтаж эмээгээ хүлээдэг байжээ. Өмнөд Калифорнийн их сургуулийг сэтгүүлч мэргэжлээр төгсөөд, 1994 оноос телевизэд ажиллажээ. 2000 эхээр сэтгүүлч гэдгээрээ олон нийтэд танигдаж, Америкийн хамгийн халуухан мэдээний хөтлөгч гэгдэж явж…
40 насандаа мэргэжлээ солин багын мөрөөдлөө биелүүлж нисгэгч болсон байна. Улмаар 2016 онд “Black ops aviation” компани байгуулж, агаарын зураг авалтын компани үүсгэн байгуулсан анхны эмэгтэй болжээ. Компани нь Netflix, Amazon компанид туслан гүйцэтгэгчээр ажиллаж байжээ. Энэ үед тэрбумтантай танилцсан байна.
Тэрбумтан Жеф Безос 2019 онд 26 жил ханилсан 4 хүүхдийнхээ ээж Маккензи Скоттоос гэрлэлтээ цуцлуулсны дараа Санчестой холбоотой тухай яриа гарсан. Удалгүй Лорен Санчес нөхрөөсөө салсан. Тэд 2023 онд Италид Безосын тансаг хөлөг онгоц дээр сүй тавих ёслолоо хийсэн. Тэрбумтны эхнэр болж байгаа Санчес гурван хүүхэдтэй. Тэрбээр 2001 онд NFL-ийн тоглогч Тони Гонзалесийн хүүг төрүүлсэн. 2005 онд Патрик Уитселтэй гэрлэж, хоёр хүүхэдтэй болжээ. Эдүгээ 55 настай Лорен Санчес энэ оны эхээр Жеф Безосын “Blue origin” компанийн New Shepard хөлгөөр Кетти Перри тэргүүтэй дан эмэгтэйчүүдээс бүрдсэн багтай сансар нисээд буусан билээ
Discussion about this post