Дорноговь аймгийн Хатанбулаг, Хөвсгөл сумдын нутаг дэвсгэрт 2024 оны 10 дугаар сард мал, амьтны гоц халдварт “Ямааны годрон” өвчин гарсны улмаас холбогдох хууль, журамд заасны дагуу 29 хот айлын 91 малчин өрхийн 14,252 толгой ямааг зориудаар устгалд оруулж, уг өвчний голомт, тархалтыг бүрэн зогсоох арга хэмжээ авсан билээ.
Монгол Улсын Мал, амьтны эрүүл мэндийн тухай хуулийн 33 дугаар зүйлд заасны дагуу гоц халдварт өвчний улмаас зайлшгүй шаардлагаар устгасан мал, тэжээвэр амьтны тухайн орон нутаг дахь жишиг үнийн 90 хувьтай тэнцэх нөхөн төлбөрийг улсын төсвөөс санхүүжүүлэхээр заасан байдаг.
УИХ-ын гишүүн, Засгийн газрын гишүүний хувиар миний бие Дорноговь аймагт үүссэн мал, амьтны гоц халдварт “Ямааны годрон” өвчний нөхцөл байдал, зориудаар устгалд оруулсан ямааны нөхөн төлбөрт шаардагдах зардлыг 2024 онд багтаан малчдад олгуулах асуудлаар Засгийн газарт танилцуулж, 2024 оны 11 дүгээр сарын 20-ны өдрийн 183 дугаар тогтоолоор 2,8 тэрбум төгрөгийг улсын төсвөөс олгуулахаар шийдвэрлүүлсэн.
Одоогоор жишиг үнийн 90 хувийн нөхөн төлбөрийн 50 хувь болох 1,4 тэрбум төгрөгийг малчдын дансанд шилжүүлээд байна.
Орон нутгаас малчдын амьжиргааг дэмжих зорилгоор нөхөн төлбөрийн зөрүү 10 хувьд шаардагдах 315,5 сая төгрөгийг 2025 онд олгохоор аймгийн ИТХ-аар баталжээ.
Discussion about this post