Халимагийн буддын шашинтны тэргүүн, Орос, Монгол, Тусгаар орнуудын хамтын нөхөрлөлийн орнууд дахь XIV Далай ламын албан ёсны төлөөлөгч Тэло Тулку Ринбүчи Оросын “гадаадын агент” жагсаалтад оржээ. Ингэж зарлуулсны дараа тэрбээр албан тушаалаа орхижээ.
Оросын Хуульзүйн яам Ринбүчиг нэгдүгээр сарын 27-ны өдөр “гадаадын агент”-ын жагсаалтад оруулжээ. Ийнхүү түүнийг “гадаадын агент” хэмээн үзэх болсон нь олон шалтгаантай бөгөөд тэр дундаа Украин руу хийсэн түрэмгийллийг эсэргүүцсэн, “Украиныг илтэд дэмжсэн”, АНУ-ын иргэншилтэй гэх зэрэг шалтгаан нөлөөлсөн байна.
Тэло Тулку Ринбүчи дайныг олны өмнө шүүмжилсэн Оросын анхны шашны зүтгэлтэн. Тэрбээр өнгөрсөн оны есдүгээр сард мэдэгдэл хийхдээ сөргөлдөөнд Украины зөв, учир нь украинчууд улс орноо хамгаалж байгаа хэмээн онцолж байв. Мөн дайныг огтоос хэрэггүй зовлон шаналал гэж байлаа. Тэрбээр “Миний нэрийг “гадаадын агентууд”-ын жагсаалтад оруулсантай холбоотойгоор олон хүн санаа зовниж, харамсаж байгаагаа илэрхийллээ. Миний төлөө санаа зовниж, ажлыг минь өндөр үнэлсэнд гүнээ талархаж байна. Халимагийн ард түмэн болон буддын шашинтнуудад энэхүү хүнд бэрх цагт эр зориг, тэсвэр хатужлаа хадгалан, Буддын сургаалд байх нигүүлсэл, хайрыг түгээсээр байхыг хүсэж байна” хэмээн Халимагийн хамба ламын суудлаас бууж байгаа талаарх мэдэгдэлдээ өгүүлжээ.
Өнгөрсөн оны намар түүнийг улс төрийн шалтгаанаар Монгол руу цагаачилсан гэх мэдээлэл Оросын хэвлэлүүдээр гарч байлаа. Тэрбээр АНУ-ын иргэншилтэй бөгөөд Пенсильвани мужид цагаач халимагуудын гэрт төржээ.
ОХУ-д “Арилжааны бус байгуулагуудын тухай” хуульд нэмэлт өөрчлөлт оруулснаар “гадны агент” гэх статус бий болж, гадаадаас дэмжлэг авдаг, “гадаадын улс орны нөлөөнд байдаг” гэх этгээдүүдийг “гадны агент” гэсэн жагсаалтад оруулж, хараат бус хэвлэлүүд, Оросын төр засгийг шүүмжилсэн хүмүүс “гадаадын агент” гэх нэр зүүх болжээ.
()
Discussion about this post