Цаашдаа 509 машин хурааж, эмнэлэг, онцгой, цагдаа, ХХЕГ, гааль зэрэг байгууллагуудад тарааж өгнө

Засгийн газрын ээлжит хуралдааны шийдвэрийн талаар ЗГХЭГ-ын дарга Д.Амарбаясгалан танилцууллаа.

 ЗГХЭГ-ын дарга Д.Амарбаясгалан: Төрийн хэмнэлтийн хуулийн хүрээнд авто тээврийн хэрэглээг хязгаарлаж, ЗГ-ын 204-р тогтоолоор ЗГ-ын автобааз улсын төсөвт үйлдвэрийн газрыг өөрчлөн зохион байгуулах, бүтэц зохион байгуулалтыг оновчтой болгох арга хэмжээ авах үүрэг чиглэл өгсөн.

ЗГХЭГ-ын даргаар ахлуулсан ажлын хэсэг өнгөрсөн хугацаанд ажиллаж уг газрын үндсэн үйл ажиллагааг өөрчлөн зохион байгуулж, төрийн өмчит аж ахуйн тооцоот үйлдвэрийн газар болгож өөрчлөх асуудлыг батлууллаа.

ЗГ-ын автобааз улсын төсөвт үйлдвэрийн газар нь 164 автомашинтай, 210 орчим ажилтантай, жилд улсын төсвөөс 3-3,2 тэрбум төгрөгийн санхүүжилт авдаг байсныг цаашдаа 100 автомашинтай, 105 ажилтантай төсвөөс санхүүждэггүй байгууллага болгож байна.

Төрийн нарийн бичгийн даргаас доош албан тушаалтан албан хэрэгцээндээ автомашин хэрэглэхийг хориглосон байгаа. Зайлшгүй шаардлагатай автомашин унах албан тушаалтанд дуудлагын такси үйлчилгээ ашиглах эрх олгоно. Ингэхдээ сар тутамдаа сард 100-200 мянган төгрөгийн хязгаартайгаар дуудлагын автомашин хэрэглэнэ.

Нийт 250 автомашиныг ТӨБЗГ хураасан, ойрын хугацаанд 250 автомашиныг хураан төвлөрүүлнэ. Нийт 509 автомашиныг хураан төвлөрүүлнэ. Ингээд эмнэлэг, онцгой, цагдаа, ХХЕГ гааль зэрэг байгууллагын хэрэгцээнд зориулан тарааж өгнө. Элэгдэл, хорогдол хэмжээндээ хүрсэн 23 автомашиныг 120 гаруй сая төгрөгөөр үнэлж дуудлага худалдаанд оруулсан.

()