Канадаас гаралтай дэлхийн поп од Жастин Бибер нүүрний саажилт өвчинтэй болсон талаараа мэдээлж, өөрийнхөө төлөө залбирахыг фэнүүдээсээ хүслээ.
Түүний энэ оны хоёрдугаар сард эхэлсэн Justice World Tour аялан тоглолт цуцлагдсан тухай зохион байгуулагчид нь мэдэгдсэн юм.
Тэгвэл өчигдөр 28 настай дуучин инстаграм хуудсандаа яагаад тоглолтоо цуцлах болсон талаараа тайлбарлажээ.
Тэрбээр “Би Ramsay Hunt syndrome гэгддэг өвчинтэй болсон юм байна. Ийм өвчин хүний чихний ойролцоох нүүрний мэдрэлийн системд нөлөөлдөг гэнэ. Миний нэг нүд анивчихгүй байгааг та нар харж байгаа байх. Нүүрний энэ хэсгээрээ би инээж чадахгүй байна. Тэгэхлээр миний нүүрний нэг тал бүрэн саажсан гэсэн үг” гэв.
Мөн тэрээр “Энэ бол нэлээд ноцтой асуудал. Миний бие махбод намайг жаахан амсхийх хэрэгтэй болсныг хэлж байх шиг байна. Та нарыг ойлгосон гэдэгт найдаж байна. Би амарч, тайвширч, зуун хувь сэргэхэд цагийг зарцуулах хэрэгтэй боллоо. Ингэснээр би хийх гэж төрсөн зүйлээ дахин хийж чаддаг болно. Миний төлөө залбираарай” гэсэн юм.
