Улсын гуравдугаар төв эмнэлгийн эмч нар уушгины артерийн хавхлагын хүнд хэлбэрийн нарийслыг судсан дотуур баллоноор тэлэх эмчилгээг өчигдөр 7 сартай хүүхдэд амжилттай хийжээ.
Эмчлүүлж буй хүүхэд зүрхний төрөлхийн гажгийн улмаас уушгины артерийн хүнд хэлбэрийн нарийслаас шалтгаалсан баруун ховдлын даралт ихсэж, мэс заслын өмнө 80 mmHg байсан ба эмчилгээний дараа 40mmHg болтол бууруулж чадлаа хэмээн тус эмнэлгийнхэн мэдээллээ.
Уушгины артерийн хавхлагын нарийсал нь баруун ховдлын даралт ихсэх зэрэглэлээс хамааран нэлээн хүнд зэргийн, хүүхдийн зүрхний төрөлхийн эмгэгүүдийн нэг аж.
Баллон катетер ашиглан тэлэх эмчилгээ нь орчин үед эрчимтэй хийгдэж буй дэвшилтэт эмчилгээний нэг арга бөгөөд нээлттэй мэс засалтай харьцуулахад эмчлүүлэгчид ямар нэг сорви үлдээдэггүй, эмнэлэгт хэвтэх хугацаа, хөнөөл багатай эмчилгээний арга бөгөөд өвчтөнд үзүүлэх ачаалал харьцангуй бага байдгаараа давуу талтай хэмээн тайлбарлав.
Discussion about this post