Хатан хаан II Елизавета хаан ширээнд суусны 70 жил буюу цагаан алтан ойг тэмдэглэх албан ёсны арга хэмжээнүүд Их Британид 6-р сарын 2-5-ны өдрүүдэд болно. Эцэг VI Жорж хаан 1952 оны 2 дугаар сарын 6-нд нас барахад II Элизабет Кени Улсаас яаралтай Лондонд ирж, 1952 оны хоёрдугаар сарын 8-нд 25 настайдаа тангараг өргөж хаан ширээнд суужээ. Хатан хаанд өргөмжлөх албан ёсны арга хэмжээ Вестминстерын эдлэнд 1953 оны 6 дугаар сарын 2-нд болсон байна. Ийнхүү зургадугаар сард хаан ширээнд суух ёслол болсон тул энэ сард алмазан ойг тэмдэглэхээр болжээ.
Хатан хааны ойд зориулж баярын жагсаал, Лондон болон бусад хотуудад фестиваль, тоглолтууд болох бол 6 дугаар сарын 4-ний өдөр Хатан хааны гэр бүл болон найз нөхдөд нь зориулсан баярын тоглолт болох аж.
Энэ хүндэтгэлийн тоглолт дээр Английн охидын алдарт хамтлаг болох “Spice Girls” хамтлаг дуулах гэнэ. Тэд хатан хааны хаан ширээнд заларсны ойд зориулсан тоглолтод оролцохын тулд эргэн нэгдэхээр болжээ. Энэ хамтлагийн гишүүдийн нас 46-49 ч эдүгээ дэлхий даяар хамгийн нэр хүндтэй Англи охидын хамтлаг хэвээрээ байна. Хамгийн сүүлд энэ хамтлаг бүрэн бүрэлдэхүүнээрээ 10 жилийн тэртээ Лондонгийн олимпын хаалтын ажиллагаан дээр хамтдаа дуулсан юм. Хамтлагийн гишүүд болох Виктория Бекхэм, Жери Холлиуэлл, Мелани Чисхолм, Мелани Браун, Эмма Бантон нар дахин хамтдаа тайзан дээр гарахгүй гэж удаа дараа ярьж байсан. Гагцхүү нэн чухал тохиолдолд л хамтран дуулна хэмээж байв. Тиймээс Хатан хааныхаа цагаан алтан ойд дуулах нь нэр төрийн хэрэг бөгөөд тус хамтлагийг эргэн нэгдэж тайзан дээр гаргаж чадах цаг үе, чухал үйл явдал мөн билээ.
Discussion about this post