“Volkswagen” группийн үйлдвэрлэсэн олон мянган шинэ автомашиныг Германаас АНУ руу тээвэрлэж явсан аварга том ачааны хөлөг онгоц дээр гал гарсан. Галд өртсөн 198 метр урт Felicity Ace хөлгийн багийн 22 гишүүнийг Португалийн тэнгисийн цэргийнхэн аварч, ойролцоох аралд хүргэсэн байна.
Харин эзэнгүй, жолоодлогогүй болсон ачааны хөлөг одоо Португалийн Азорын арлуудын ойролцоо Атлантын далайн усанд шатаж байгаа. Volkswagen группийн мэдээлснээр хөлөг дээр нийт 3,965 автомашин байгаа гэнэ.
Тус группийн үйлдвэрлэсэн Porsche, Audi, Lamborghini брэндийн автомашинууд шатаж буй хөлөг дээр байгаа ажээ.
Зөвхөн Porsche брэндийн 1,100 автомашин гал гарах үед хөлөг дээр байсныг мэдээлсэн байна.
Хамгийн сүүлд 2019 онд Grande America ачааны хөлөг дээр гал гарч, живэхэд Audi, Porsche брэндийн 2,000 гаруй тансаг ангиллын автомашин хамт шатаж, живсэн юм.
Цар тахлын улмаас автомашин үйлдвэрлэлийн салбар ачаа тээвэрлэлтийн саатал, чип, хагас дамжуулагч эд ангийн хомсдолд нэрвэгдээд байгаа. Ийм хүнд хэцүү цаг үед Volkswagen групп томоохон хохирол амсаж байна.
Felicity Ace хөлгийг чирэх боломжийг судалж байна. Энэ осол одоогоор далайн усыг бохирдуулсан ямар нэг шинж тэмдэг илрээгүй байгаа аж.
Discussion about this post