Швед улс өндөр хөгжилтэй, олон талаар дэлхийн нийтэд сайн жишиг тогтоож, үлгэр жишээ болдог ч асуудал байсаар байна. Тухайлбал иргэд гудамж талбайд тамхины ишээ хаядаг зуршил байсаар, энэ асуудлаас ангижирч чадсангүй. Хог хаядан хүмүүсийг сургахаас илүүтэйгээр хотынхоо хэрээнүүдийг тамхины иш, жижиг хог цуглуулдаг дадалд сургах болжээ.
Ингээд Стокгольмын дагуул хот Седертелье-д тамхины иш түүсэн хэрээг хооллох төсөл хэрэгжүүлж эхэлсэн байна. Төслийг санаачилж, хэрэгжүүлэгчдийн хэлж байгаагаар хэрээ нь оюун ухааны хөгжлөөр долоон настай хүүхдийн түвшинд хүрдэг ажээ.
“Шведэд журам сахь” сангийн мэдээлснээр, хотын гудамжинд жил бүр нэг тэрбум орчим тамхины иш хаягддаг нь бүх хогийн 62 хувийг эзэлдэг байна. Зөвхөн Седертелье хот гэхэд л гудамжны цэвэрлэгээнд 20 сая швед крон (2 сая гаруй ам.доллар) зарцуулдаг тул хог түүх ажилд хэрээг сургаснаар зардлынхаа 75 хувийг хэмнэх аж.
Discussion about this post