Камиллаг ирээдүйн хааны хатан болгох хүсэлтээ хатан хаан илэрхийлжээ

Их Британийн хатан хаан Элизабет хаан ширээнд заларсныхаа 70 жилийн ойг тохиолдуулан хийсэн мэдэгдэлдээ ирээдүйн хааны хатны нэрийг зарлажээ.

Түүнийг хүү Чарльз нь залгамжилж Их Британийн дараагийн хаан болох ёстой. Ирээдүйн хааны хатнаар хунтайж Чарльзын гэргий, Корноуэлын гүнгийн ахайтан Камиллаг өргөмжлөх хүслээ хатан хаан илэрхийлсэн байна. Ингэснээр Чарльзыг хаан ширээнд залрах үед Камилла шууд хатан болох боломж нээгджээ.

Өмнө нь түүнийг хатан болохгүй, харин “хааны гэргий” гэх хэргэмтэй болно гэсэн таамаглаж байсан юм. Тэгээд ч Диана гүнжийн фэнүүд Камиллаг хэзээ ч хүлээн зөвшөөрдөггүй, үзэн ядагч ихтэй эмэгтэй. Харин хатан хаан “Цаг нь ирэх үед Камиллаг хатан болгох хүслээ би үүгээр илэрхийлж байна” гэж хатан хаан мэдэгдэлдээ өгүүлсэн байна. Эндээс харахад хатан хаан Элизавета бэр Камиллатайгаа сайн ойлголцдог, хүлээн зөвшөөрдөг бололтой.

Хунтайж Чарльз, Камилла хоёр өмнө нь гэр бүлтэй байж, нууц амрагийн харилцаатай байсан. Тус тусын гэр бүлээсээ салсан Чарльз, Камилла нар бүр сүүлд 2005 онд гэрлэж байжээ. Хунтайж Чарльз 1996 онд гүнж Дианагаас салсан. Тэднийг салснаас хойш жилийн дараа Диана автын ослоор Парис хотод нас барсан юм.

Одоо 74 настай Камиллагийн цол хэргэм ирээдүйд ямар байх талаар эргэлзээ ийнхүү арилж байна.

Хатан хаан Элизабет 1952 онд Их Британийн хаан ширээнд заларч байжээ. Тэрбээр хаан ширээнд залраад 70 дахь жилийнхээ ойг үзсэн Британийн анхны ихэс дээдэс болж, түүхэнд бичигдэх юм.

Хаан ширээг залгамжилсны 70 жилийн ой өнөөдөр тохиож байна.