Холливудын жүжигчин Анжелина Жоли, Билли Боб Торнтон нар гэрлэж, 2000-2003 онд хамт амьдраад салсан юм. Тэр үед Боб Торнтон 5 дахь удаагаа, Жоли хоёр дахь удаагаа гэрлэж байв. 20 гаруй насны зөрүүтэй хосууд савхин хувцас, футболкатай хуримлаж, цусаа гаргаж, тангараг өргөсөн. Хэдийгээр тэд 3 жил амьдраад салсан ч ойр дотныхондоо их дурсамж үлдээсэн бололтой.
Тэд салсан ч Анжелина Жоли экс нөхрийн бага хүү Харри Жеймс Торнтонтой одоо ч сайн харилцаатай байдаг аж. Саяхан Анжелина Жолигийн “дагавар хүү” байсан 27 настай Харри Жеймс Торнтон Жолиг өнөөг хүртэл хүндэлж явдаг, өөрт нь бичдэг захидлуудыг ч хадгалсаар байгаа талаараа ярьжээ.
Харри “Тэр одоог хүртэл надад жил бүр Зул сарын мэндчилгээ, бэлэг илгээдэг” гэж Харри Entertainment Tonight сэтгүүлд өгсөн ярилцлагадаа хэлжээ. Мөн “Би түүнтэй хааяа утсаар ярьдаг” гэсэн байна.
Жоли, Торнтон нар эхнэр нөхөр байх хугацаанд Жоли Торнтоны хүүхдүүд болох тухайн үед таван настай байсан Харри, 20 настай настай Аманда нарын хойд ээжийн үүрэг гүйцэтгэж байв. Харри багадаа Анжелина Жолитой их цаг хугацааг өнгөрөөсөн нь түүнийг алдартай хүүхдүүдийн оролцдог реалити шоунд бэлтгэхэд их тусалсан гэжээ.
“Тэр үнэхээр сайн байсан. Тэр биднийг долоо хоног бүр зугаалгаар авч явдаг, нэг удаа RV (дотроо гэр шиг тохижуулан зассан ачааны машин) түрээслэн, холын аялал хийсэн. Миний санахын тэр маш хөгжилтэй эмэгтэй байсан” гэж Анжелина Жолиг сайхнаар дурсжээ.
Жоли, Торнтон нар тус тусынхаа замыг хөөсний дараа Жоли жүжигчин Брэд Питттэй 2014 онд дахин гэрлэж, 2019 онд салсан билээ. Тэд 20 настай Мэддокс, 18 настай Пакс, 17 настай Захара, 17 настай Шило, 16, 13 настай ихэр болох Нокс, Вивьен хэмээх зургаан хүүхэдтэй юм.
Торнтон 2018 онд “HFPA in Conversation”-д өгсөн ярилцлагынхаа үеэр Жолитой өнгөрүүлсэн гурван жилийн гэрлэлтийнхээ тухай “Энэ бол үнэхээр сайхан цаг байсан. Энжи одоо ч миний найз хэвээр бөгөөд тэр бол маш их зүйлийг хийсэн агуу хүн. Тэр амжилтад хүрэх эсвэл бүтэлгүйдэх эсэхээс үл хамааран түүний хувьд чухал ач холбогдолтой гэж үзсэн кинонуудаа бүтээдэг. Би түүнийг үргэлж хүндлэх болно” гэжээ. Найруулагч Боб Торнтон, Анжелина Жоли хоёр “өөр өөр амьдралын хэв маягтай” байсан учраас салсан гэдэг. Боб Торнтон энэ талаар “Түүнийх бол дэлхийг хамарсан амьдралын хэв маяг, би бол агорафоби (физиологийн, танин мэдэхүйн болон зан үйлийн) амьдралын хэв маягтай. Тиймээс энэ бол бидний өнөөг хүртэл хамт байхгүй байгаа цорын ганц шалтгаан юм” гэжээ.
Торнтон Жолигээс салсны дараа “Мичин гариг” кинонд тусгай эффект бүтээдгээрээ алдартай Конни Англандтай 2014 онд гэрлэсэн бөгөөд тэд 17 настай Белла хэмээх охинтой.
Discussion about this post