11 дүгээр сард болох Г.Ариунбаатар, Б.Алтанжаргал, Д.Отгонжаргал, Д.Ука, Ш.Чимэдцэеэгийн тоглолт хойшлох нь

Энэ 11 дүгээр сард Ардын жүжигчин Ш.Чимэдцэеэ, МУГЖ Самандын Жавхлан, МУГЖ Г.Ариунбаатар, Д.Отгонжаргал, Ардын дуучин Алтанжаргал, “Киви”-гийн Ука, Ангирмаа, Оюунбилэг хоёр, Баярцэцэг, Наран хоёр хамтарч тоглох зэрэг олон тоглолт товлогдож, зар сурталчилгаагаа цацаад байлаа. Харамсалтай нь коронавирусын халдвар дотоодод гарснаас үүдэн энэ бүх тоглолт цуцлагдсан. Тухайлбал дуучин Д.Отгонжаргалын “хун галуу” тоглолтын бүх тасалбар зарагдан дуусжээ. Тэрээр тоглолтынхоо тасалбарыг худалдаж авсан үзэгчдээ билетээ хадгалж байхыг мэдэгдсэн. Ардын жүжигчин Ш.Чимэдцэеэ амьдардаг байраа алдах шахуу хүнд үедээ хувийн санхүүд нэмэр болгохоор хийсэн тоглолт түр зуур хойшлохоор болж байгаа нь хүнд цохилт болж байгаа биз ээ. Дуучин С.Жавхлан “Их наяд” ресторанд хоёр өдөр буузтай хуушууртай, махтай сүүтэй цайтай жинхэнэ “монгол” тоглолт хийхээр болсон ч мөн л тодорхойгүй хугацаагаар хойшлогдлоо. УГЖ С.Жавхлан амжаад Бөхийн өргөөнд ч, UB паласт ч хэд тоглосон хүн хэсэгтээ алзахгүй. Тэгээд ч “Хамаг Монгол” төслөөрөө Чингис хаан одон гардана гээд омог бардам явна.