22 давхар барилгатай тэнцэх өндөр “Их цагаан суварга”-ыг 8,8 тэрбум төгрөгөөр барина

Булган аймаг сүүлийн хэдэн жилийн хөгжлийн бодлогодоо аялал жуулчлалын бүс нутаг болох төсөл хөтөлбөрүүдийг олон арга хэмжээнд тусгаад байгаа.

 Булган аймгаас сонгогдсон УИХ-ын гишүүн Ц.Анандбазарын санаачлагаар Ачуут баг хуучнаар Эрдэнэдайчин Вангийн хүрээний Их Цагаан Суваргыг бүтээх, шав тавих ёслолын ажиллагаа боллоо. Ёслолын ажиллагаанд суваргын шавийг тавихад адислахаар Хансүр Жадо Ринбүчи тэргүүтэй лам нар хүрэлцэн ирж, газар нутаг аргадан ном хурлаа.

Одоогийн Булган аймгийн нутаг, хуучнаар Чин вангийн хүрээ Дашчойнхорлон хийдийг Чин ван Ханддорж удирдан санаачилж 1904 онд анх босгож байсан юм. Эдүгээ ийнхүү 22 давхар барилгатай тэнцэх өндөр бүхий 8,8 тэрбум төгрөгөөр босох эв нэгдлийн бэлэгдэл “Их цагаан суварга” хоёр жилийн дотор босож сүсэгтэн олныг баясгаж байх юм байна. Мөн доод давхартаа Анхдагч Алдартаны музейтэй байхаас гадна шөнийн цагаар ч олон өнгийн үзэмжит гэрлээр гэрэлтэх юм байна. Уг төслийн анхны санхүүжилтийг “Содмонгол групп” эхлэн гаргана. Өнөөдрийн арга хэмжээнд Аймгийн ЗДТГ зохион байгуулалтын зүгээс хамтран ажиллаж, нээлтийн үйл ажиллагаанд Аймгийн Засаг дарга Б.Ариун-Эрдэнэ оролцлоо.