Нийслэлийн Шүүхийн Шийдвэр Гүйцэтгэх Газар (НШШГГ)-ын даргаар ажиллаж байсан хурандаа Р.Энхтайван болон тус газрын Банк, хадгаламж зээлийн хоршоодын төлбөр барагдуулах албаны ахлах шийдвэр гүйцэтгэгч асан Б.Мөнхтуяа нарт хахууль өгсөн хэргээр дуучин, СТА Э.Оюумааг яллагдагчаар тооцсон хэргийг Баянгол дүүргийн Эрүүгийн хэргийн анхан шатны шүүх хэлэлцэн шийдвэрлэсэн. Шүүхээс хурандааг нийтийн албанд томилогдох эрхийг таван жилээр хасаж, хоёр жилийн хорих, экс ахлах шийдвэр гүйцэтгэгчийг мөн таван жилийн хасах ял, 10 сая төгрөгийн торгох ялаар шийтгэсэн бол олны танил дуучинд 5,4 сая төгрөгийн торгох ял оногдуулсан.
Энэ хэргийн тухайд дуучин Э.Оюумаа Дархан-Уул аймгийн Хонгор сум дахь хоёр обьектын өмчлөх эрхийг нөхрийнхөө “Ньюсиян” компанид шилжүүлэхийг мэдэгдсэн албан бичиг гаргуулах буюу давуу байдал олж авах зорилгоор НШШГГ-ын даргад 1700 долларыг Б.Мөнхтуяагаар дамжуулан өгсөн нь тогтоогдсон. Ахлах шийдвэр гүйцэтгэгч, дуучин хоёр найз гэнэ. Өмчлөх, эрх шилжүүлэх үйл явц нь хариуцагчид мэдэгдэх зэрэг тодорхой хугацаа, дэс дараалал шаардсан ажиллагаа байжээ. Гэсэн дуучин “хурдан шийдээд өгөөч” гэж гуйсан тул 2020 оны 3-р сард даргадаа хандан мөнгө санал болгосон ч “тийм асуудал байхгүй, мөнгөөр асуудлыг шийдэхгүй” гээд гаргасан гэжээ. Хоёр сарын дараа энэ тухай ахин хөндөгдсөн байна. Тухайн үед дарга хурандаад байрны квот орж ирсэн агаад урьдчилгаа мөнгөө бүрдүүлж байжээ. Тэрээр ахлах шийдвэр гүйцэтгэгчээс мөнгө зээлэхээр болж тохирсон ч “чи бид хоёрын дунд мөнгөний асуудал байх ёсгүй шүү” гэдгийг сануулсан гэнэ. Зээлүүлсэн мөнгийг дарга хурандаагийн найз Амарбаясгалангийн нэрээр авчээ. Дуучин нь мөнгөө валютаар өгөхөөр болж 1700 доллар бэлдсэн. Мөнгийг “Бүлл” гэдэг ресторанд өгчээ. Нөхрийнх нь “Ньюсиян” компанид Дарханы хоёр обьектын өмчлөх эрхийг шилжүүлэх бичиг ч гарч, харин Б.Мөнхтуяа долларыг даргын байрны урьдчилгаанд зээлүүлсэн мөнгөндөө суутган авчээ. Тэрээр “зээлүүлсэн мөнгөндөө суутгах бодолтой байсан, Оюумаа Энхтайван хоёр уулзаагүй, мөнгө авсныг ч мэдээгүй” хэмээн даргаа хамгаалсан. Гэсэн ч шүүх хахуулийн мөнгийг өөрөө аваагүй ч өр зээлэндээ суутгуулсан нь хахууль авах нэг хэлбэр гэж үзсэн. Өмч шилжүүлэх бичиг авахын тулд мөнгө өгсөн талаар эхнэрээсээ сонссон тухайгаа дуучны нөхөр ч мэдүүлсэн байна. Уг 1700 доллароос үлдсэн 200 долларыг АТГ-ынхан хураан авчээ. Энэ хэргийг илрүүлэхийн тулд нууц ажиллагаа явуулсан. Мөнгө нэхсэн, мөнгийг авсан, авсан мөнгөндөө тааруулаад хоёр тал авлага, өглөггүй болж байгаа тухай яриа бичигдсэн гэнэ. Тухайн үед шүүхийн шийдвэрийнхэнд тухайн үед байрны квот оногдсон байна. Уг байр нь албаных байж болзошгүй нөхцөл байдал илэрсэн гэнэ.
Discussion about this post