Нийслэлийн Гаалийн “хурган” дарга 10 кг будаа авлигад аваад баригджээ

Оймсондоо арван  мянган ам.доллар нууж байгаад Авлигатай тэмцэх газрынханд “гардуулсан” Мэргэжлийн хяналтын ерөнхий газар /МХЕГ/-ын Хил хорио цээрийн хэлтсийн дарга асан  Н.Баярсайхан 2 жил 8 сар хоригдохоор болсон билээ. Гэвч үүнээс сургамж авч хашрахгүй, төрийн албаныхан авлига авах үйлдэл гарсаар байна. Тухайлбал Улаанбаатар хот дахь Гаалийн газрын Гаалийн хяналт, шалгалт хариуцсан орлогч дарга О.Цогтбаатар авлига авч байгаад үйлдэл дээрээ баригдсан. Тэрбээр Дуурь бүжгийн эрдмийн театрын автомашины зогсоолд машин дотор 10 кг цагаан будаа, 1,5 сая төгрөг авсан нь мөрдөн байцаалтаар тогтоогджээ. Орлогч даргаас гадна мөн газрын гаалийн улсын ахлах байцаагч, байцаагч хоёр холбогдсон. Тэд Баянгол дүүргийн 4 дүгээр хорооны нутаг дэвсгэрт байрлах Улаанбаатар төмөр замын Ачих Буулгах Тээвэр Экспедицийн Механикжсан Анги /АБТЭМА/-ИЙН терминалын байрны ариун цэврийн өрөөнд гэхчлэн 50-100 мянган төгрөгийн хахууль авсан гэж тогтоогдсон аж. Экс орлогч дарга болон байцаагч нарт Солонгосоос нэг чингэлэг бараа оруулж ирсэн иргэн Б.Т хахууль өгсөн гэжээ. Хахууль өгөхдөө бараагаа жинлүүлэхгүй гаргах зорилгоор авлига өгсөн гэнэ.